Oppgåve

Stell av snittblomstrar og staffasje

Ei av dei viktigaste oppgåvene ein blomsterdekoratør gjer, er å stelle blomster, grønt, greinar og kvistar slik at dei kan halde lengst mogleg. Ulike blomstrar treng ulik behandling. I denne oppgåva skal du lage ei oversikt over varebehandling av det plantematerialet du bruker.

Tre små blomsterbukettar. Foto. — Bilete: Lise Fridholm / CC BY-NC 4.0

Oppgåve i varebehandling

I denne oppgåva skal du lære korleis dei ulike blomstrane du bruker skal behandlast. Etter kvart som du får erfaring med ulikt plantemateriale, kan det vere lurt å notere ned optimal behandling av dei ulike artane. Bruk skjemaet under og noter korleis du på best mogleg måte tek vare på ulike blomstrar og staffasje. Sjå gjerne på døma nedst, men bruk dine eigne ord og erfaringar når du blir kjent med ulike blomstrar, grønt og greiner.

Botanisk namn

Påskelilje. Foto. — Påskelilje har *Narcissus pseudonarcissus* som botanisk namn. Bilete: Martin Hirtreiter / CC BY-SA 4.0

Botanisk namn består av slektsnamn og art. Til dømes Narcissus (slektsnamn) pseudonarcissus (art). Det norske namnet er påskelilje. Som blomsterdekoratør skal du kunne både det botaniske namnet og det norske namnet.

Utsjånad

Beskriv blomsteren sin utsjånad. Det kan vere ei hjelp å bruke verktøyet FLOF, som står for form, linje, overflate og farge.

Varebehandling

Beskriv korleis du bør behandle blomsteren. Reint vatn, næring og reine vasar er alltid viktig. Men skal du snitte rett eller skrått, og kva temperatur skal vatnet ha? Kor lenge skal blomsteren trekkje vatn, og kor kaldt skal han takast vare på? Treng alle blomstrar høg luftfukt, eller kan somme blomstrar lett få fuktskade? Kva temperaturar trivst tropiske blomstrar best i?

Filer

Varebehandling skjema(DOCX)

Ulike sortar blomster som står i bøtter. Foto. — Snitt og ta bort blad og tornar på nedste del av stilken. Bilete: Hanne Merethe Riskedal Staurland / CC BY-SA 4.0

Døme

døme på varebehandlingsskjema
Botanisk namn: slekt/art	Norsk namn	Utsjånad	Varebehandling
Rosa x hybrida	Rose	Form: hovudform rund, men open form. Middels til stor Linjer: lang og rett stilk Overflate: matt overflate Farge: finst i mange ulike fargar, ofte sterke fargar	Fjern alle tornar og blad nedst på stilken. Lag eit reint skrått podesnitt. Næring i vatnet. Vatn: 40–50 gradar i rein bøtte/vase. Trekktid: ein til to timar. Blir tatt vare på på kjøle.
Anthurium andraeanum	Stor flamingoblomster	Form: Stor, rund form som endar ut i ein spiss Linjer: Boga linje som går ut i ein spiss. Rett linje i stilken Overflate: glatt og blank, nesten metallisk eller plastisk Farge: grøn, raud, kvit. Finst òg som burgunder mot svart og raud mot rosa	Lag eit reint skrått podesnitt med skarp kniv. Sårflata må vere glatt. Ikkje klem stilken. Næring i vatnet. Vatn: om lag 30 gradar i ei rein bøtte/vase. Trekktid: ein til to timar. Treng ikkje å stå på kjøle.
Tulipa x hybrida	Tulipan	Form: spiss form. Linjer: rett linje i stilk Overflate: glatt. Farge: finst i mange ulike, ofte sterke fargar	Blir rett over snitta med eit reint snitt. Bruk alltid kniv. Ikkje klem stilken. Treng ikkje næring i vatnet. Vatn: om lag 20 gradar i ei rein bøtte/vase. Blir teke vare på på kjøle.