QR-løp om målgruppeval

Elevane skal skanne QR-kodar for å finne faginnhald på ulike postar.

Del elevane i fem grupper. Kvar gruppe får eit gruppenummer.

Plasser postane på ulike stader på skuleområdet. Gjer det lett å finne dei. Viss postane er plasserte på eit større område, kan du lage eit enkelt kart over postane. Du finn postane og støtteark til QR-løpet nedst på denne sida.

Nokre av postane har videoklipp og må vere ein stad der elevane kan spele av lyd, eventuelt kan elevane bruke høyretelefonar.

Skriv ut dokumentet med QR-postane og plasser ut desse før timen startar.

På nokre av postane blir elevane oppmoda til å teikne/lage skisser, så sørg for at utstyr som trengst, som ark og teiknesaker, blir plassert ut på dei aktuelle postane.

Gjer ein enkel test og sjekk at kodane fungerer.

Elevane kan gjerne lese aktuelle fagartiklar i forkant, med beskjed om at dei får oppgåver frå følgande fagartiklar på NDLA:

• Marknadssegmentering

• Strategiar for målgruppeval

• Persondata og målretta marknadsføring

• Målgruppeval og marknadsstrategi

• Burger King og målgrupper

Elevane skal innom alle postane.

Sett av like lang tid, til dømes 10 minutt, til kvar post. Bruk alarm for å halde tida. Lag eit signal som betyr at elevane skal byte post.

Elevane startar på same nummer som gruppenummeret, og følger postane vidare i riktig rekkefølge.

Læraren går innom gruppene undervegs medan QR-løpet går føre seg.

Det er formålstenleg med ei form for etterarbeid i klasserommet etter gjennomført QR-løp, der gruppene deler det dei har komme fram til / jobba med. Eit døme på eit slikt opplegg kan vere:

• Kvar av gruppene trekker eit tal frå 1 til 5, og talet dei trekker representerer talet på posten i QR-løpet dei skal presentere.

• Gi gruppene nokre minutt til å førebu det dei skal presentere.

• Kvar gruppe skal så presentere for klassen det dei har komme fram til på den aktuelle posten.

• Gjennomfør ein felles refleksjon i klassen etter kvar presentasjon.

Kanskje det òg kan vere aktuelt å legge inn eit konkurranse- og /eller vurderingselement? Til dømes at lærar (og/eller klassen i fellesskap) vurderer og premierer beste gruppe?