Utarbeide personas
Personas er oppdikta personar som kan representere målgruppa eller målgruppene til ei verksemd. Ei verksemd kan ha éin, to eller fleire kundepersonas.
Beskriving av personas for NDLA
Bilete 1:
Namn: Mohammed
Alder: 18 år
Stilling: elev på studiespesialisering med realfag, vg3
Familie: mor, far og fire søsken
Type: pliktoppfyllande, lærevillig, sjølvstendig
Skulefagleg: språkleg svak i norsk (har norsk som andrespråk), men sterk i engelsk, er realfagleg sterk
"Eg saknar omgrepslister og ordforklaringar i lesefag som historie og religion. Siste oppleving: Mohammed skulle lage ei prosjektoppgåve med temaet kolonialisme i historie, men strevde med å få oversikta over innhaldet i temaet, og kva innhald som var viktigast å presentere i oppgåva.
Mål: Mohammed ønsker å studere medisin for å bli lege. Skal han komme inn på legestudiet, må han fullføre vidaregåande skule med beste karakterar i dei aller fleste faga og ha fagleg fordjuping i realfaga.
Bilete 2:
Namn: Helge
Alder: 58 år
Stilling: yrkesfaglærar i bygg- og anleggsteknikk, utdanna tømrar og adjunkt
Familie: kone og tre vaksne søner
Type: utrygg på digitale verktøy, trivst best når ting er føreseielege
"Eg skulle ønske vi kunne dele undervisningsopplegg med kvarandre på gamlemåten, ikkje som digitale ressursar. Siste oppleving: Helge skulle dele ein tverrfagleg ressurs om oppussing av bad i bygg- og anleggsteknikk og matematikk, men synest det var umogleg å forstå korleis han skulle dele ressursen i ei mappe på Min NDLA.
Mål: Helge ønsker at flest mogleg elevar skal bestå med best mogleg resultat. Han ønsker òg at åra på bygg- og anleggsteknikk skal gi elevane hans ein best mogleg start på livet og yrkeskarrieren.
Bilete 3:
Namn: Lise
Alder: 16 år
Stilling: elev på helse- og oppvekstfag, vg1
Familie: bur heime hos mor, som er eineforsørgar
Type: usikker, låg sjølvtillit, usjølvstendig, pliktoppfyllande
Skulefagleg: svak lesar, manglar forståing og strategiar for å tileigne seg kunnskap. Har behov for praktisk tilnærming til faga.
"Eg synest lange fagtestar og lange tekststykke i matematikk er vanskeleg. Siste oppleving: Lise skulle lese til ei viktig prøve i norskfaget om samansette tekstar, men fann ingen forenkla versjon av teksten.
Mål: Lise ønsker å bli barne- og ungdomsarbeidar. Ho må derfor ha karakteren 2 eller betre i alle fag, og gå to år i lære der ho bruker fagstoffet og viser at ho er eigna i faget for å få fagbrev.
Bilete 4:
Namn: Monica
Alder: 36 år
Stilling: lektor på studieførebuande utdanningsprogram
Familie: mann og to små barn
Type: "early adopter", lærevillig
"Eg ønsker å bli betre til å remikse innhald frå ulike stader. Siste oppleving: Monica fann ein spennande undervisningsressurs på nett som ikkje fungerte for elevane hennar utan remiksing og tilpassing. Moglegheitene for å få til nettopp dette var få, og verktøya tungvinte.
Mål: Monica ønsker å finne og innhente innhald og tilpasse det til eigne behov. Ho ønsker òg å dele eige (tilpassa) innhald.
Her er nokre fleire døme på ulike personas:
Vel mellom oppgåve 1, 2 og 3 (eller gjer alle viss du vil).
Tenk deg at du skal starte ei verksemd der du skal tilby ulike friluftslivskurs, som toppturkurs, skredkurs og fjellski- og offpiste-kurs. Lag to eller fleire forslag til personas for målgruppa/målgruppene du ønsker å vende deg til.
På kva måtar trur du arbeidet med å lage personas kan vere nyttig for denne tenkte verksemda?
Lag to eller fleire forslag til personas for Zalando, ein nettbutikk som i hovudsak sel klede, sko og tilbehøyr.
På kva måtar trur du arbeidet med å lage personas kan vere nyttig for Zalando?
Lag to eller fleire forslag til personas til Pink Fish, ei hurtigmatkjede med fokus på norsk sjømat.
På kva måtar trur du arbeidet med å lage personas kan vere nyttig for Pink Fish?