Når éi celle deler seg og blir til to heilt identiske celler
Ved vanleg celledeling vil éi celle, gjerne kalla "morcella", dele seg og danne to nye "dotterceller". Dei to nye cellene vil då vere identiske med morcella og innehalde det same arvestoffet.
Eincella og fleircella organismar
Eincella organismar formeirar seg ved vanleg celledeling og produserer på den måten nye avkom. Hos ein fleircella organisme skjer mitose til kvar tid i heile kroppen og gjennom heile livet. Dei nye cellene som blir danna, skal gi vekst og erstatte celler som er skadde eller utslitne.
Det er spesielt høg aktivitet av mitose på fosterstadiet til ein organisme. Den befrukta cella er avhengig av tallause celledelingar for å kunne vekse og utvikle seg frå ein zygote til ein fullverdig organisme som består av ulike celletypar, vev og organ.
Delingsfasen ved mitose
Når cella har oppnådd riktig storleik, og det genetiske arvestoffet er korrekt kopiert ved DNA-replikasjon, gjer cella seg klar for delingsfasen: mitose.
Mitose er ein nøye kontrollert prosess der cella gjennomgår fem ulike fasar:
profase
prometafase
metafase
anafase
telofase
Mitose steg for steg
Illustrasjonane er forenkla og inkluderer berre fire søsterkromatid. I verkelegheita har alle cellene 46 søsterkromatid som blir trekte frå kvarandre, slik at kvar celle ender opp med 46 enkle kromosom.
Tenk over
Kva skjer med cellene når ein organisme veks?
Kva er føremålet med mitose?