Kartlegging av handelsnæringa
Korleis ser handelsnæringa ut der du bur? Tek butikkane grep for å følgje med på nye trendar og handlemønster?
Oppgåve – i klassa og i grupper
Del 1: Førebuingar (i klassa)
- Jobb saman i klassa for å få ei oversikt over butikkar og handlesenter der de bur. Del inn butikkane etter kva bransje dei tilhøyrer.
- Del klassa inn i små grupper på 2–3 elevar, og fordel bransjane mellom gruppene.
Forslag til bransjeinndeling
elektro- og kvitevareforhandlarar
kles- og skobutikkar
- sportsbutikkar
- daglegvarebutikkar og andre matbutikkar
- apotek og helsekostforretningar
- serveringsstader
- møbel- og interiørbutikkar
- frisørar, helse- og skjønnheitssalongar
- andre
Del 2: Lag ei marknadsundersøking (i klassa og i grupper)
- No skal de gjennomføre ei marknadsundersøking i dei ulike bransjane.
- Bestem dykk for kva type undersøking de vil gjennomføre. De kan bruke fleire typar dersom de meiner at det er føremålstenleg, kanskje både ei generell spørjeundersøking og eit intervju?
- Start med å lage ei undersøking i fellesskap i klassa. Formuler spørsmåla saman. Deretter justerer kvar gruppe spørsmåla slik at dei passar til den aktuelle bransjen.
Tips til spørsmål de kan stille butikkane i marknadsundersøkinga
Kjenner de til nye trendar og handlemønster?
- Kva for nokre?
- Kva konsekvensar får dei for butikkane i bransjen dykkar?
Tilpassar de butikken dykkar til nye trendar og handlemønster?
- Kva for nokre, kvifor og korleis?
- Har eventuelle tilpassingar resultert i auka sal?
Kva endringar bør de gjere for å auke salet?
- Kvifor og korleis?
Har de tenkt på nye løysingar?
- Kva for nokre, kvifor og korleis?
- Bestem dykk for korleis de vil kontakte butikkane, til dømes om de vil besøkje dei personleg, sende dei e-post, ringje dei eller kontakte dei via sosiale medium.
Ulike verktøy for å gjennomføre undersøkingar
spørjeundersøkingar
- ved personleg frammøte
- via e-post
- via sosiale medium
- med SurveyMonkey
- med EasyQuest
- med Google Skjemaer
- intervju
Del 3: Gjennomføring og analyse (i grupper)
- Kontakt butikkane på førehand, og lag avtalar for å gjennomføre undersøkinga.
- Gjennomfør undersøkinga.
- Analyser funna i bransjen "dykkar".
- Lag ein presentasjon av funna dykkar.
Del 4: Presentasjon (i klassa)
- Kvar gruppe viser presentasjonen sin for resten av klassa.
- Noter viktige funn på tavla.
- Diskuter likskapar og ulikskapar mellom bransjane.
- Lag ein samla presentasjon av funna som er felles for heile handelsnæringa der de bur, og send ho gjerne til næringssjefen i kommunen. Dette kan vere viktig informasjon kommunen kan bruke i arbeidet med næringsutvikling.
Lykke til!
Relatert innhald
CC BY-SASkrive av Cathrine Meyer Johansen.
Sist fagleg oppdatert 05.02.2021