På veg mot ein global landsby?
Den internasjonale mediestrukturen er i dag prega av store globale selskap, og kommersialisering og globalisering er framståande. Medium smeltar saman, mediestraumane kryssar landegrensene, og eigarkonsentrasjonen aukar.
Utviklinga av informasjonsteknologien har ført til at menneske frå ulike delar av verda i dag er knytte tettare til kvarandre enn før. Denne utviklinga har skjedd parallelt med utviklinga av ein global økonomi.
Distribusjonsleddet har blitt viktigare
Teknologi har alltid blitt brukt for å støtte opp om strategien og forretningsmodellen til medieselskapa. Det nye er at distribusjonsleddet har blitt eit konkurransemessig fortrinn. Vi kan seie at mediedistribusjon har blitt sentrum (noden) for korleis verdiane blir skapte, i samspel med medieproduksjon, medieinnhald og mediekonsum. Drivkrafta her er digitaliseringa.
Selskap som Meta, Netflix og Spotify har i dag unike posisjonar som plattformer for å kople deg og meg som brukarar til innhaldet – samtidig som dei koplar oss som brukarar til annonsørar og knyter oss til andre brukarar. Dei dataa som vi brukarane legg frå oss, er det som er verdifullt. Desse dataa bruker selskapa for å tiltrekkje seg annonsørar og skreddarsy innhaldet sitt til deg og meg.
Dei største medieselskapa
Det tyske instituttet for medie- og kommunikasjonsstrategi (IfM) har laga ei oversikt over dei 50 største medieselskapa globalt. La oss ta ein titt på denne oversikta:
Nr. | Namn | Nasjon | Type selskap | Omsetning 2020 | Kommentar |
|---|---|---|---|---|---|
1 | Alphabet | USA | Søkjemotor og programvare. | 182 milliardar dollar | Google skifta namn til Alphabet i 2015. Eig søkjemotoren Google og plattforma YouTube. 83 % av inntektene frå annonsar (2019). |
2 | AT&T | USA | Telekommunikasjon, film- og tv- produksjon, satellitt-tv, strøymetenester og annonsar. | 171 milliardar dollar | Selskapet kjøpte opp Time Warner i 2018 for 85 milliardar dollar. |
3 | Comcast | USA | Kabelnettverk, tv, telekommunikasjon og filmproduksjon. | 103 milliardar dollar | Selskapet slo seg saman med NBCUniversal i 2011. Eig 2 tv-nettverk, 26 tv-stasjonar, 20 kabelkanalar og filmprodusjons-selskapet Universal. |
4 | Meta | USA | Sosiale medium og kommunikasjon. | 85 milliardar dollar | Selskapet skifta namn frå Facebook til Meta i november 2021. Eig dei sosiale media Facebook, Instagram, Messenger og WhatsApp. 98,5 % av inntektene kjem frå annonsar (2019). |
5 | Tencent | Kina | Sosiale medium, nettspel og e-handel. | 69 milliardar dollar | Selskapet eig WeChat, QQ og 12 % av Snapchat. 18 % av inntektene kom frå annonsar (2019). |
6 | Disney | USA | Film, tv-kanalar, tv-produksjon, tv-stasjonar, video/dvd, radio, videospel, bøker, magasin, temaparkar og hotell. | 65 milliardar dollar | Selskapet tok i 2019 over filmselskapet |
7 | Apple | USA | Strøymetenester for musikk og film, tv-produksjon og lisenssal. | 53 milliardar dollar | Selskapet starta opp med Apple TV + i november 2019. |
8 | Charter Communications | USA | Kabelnettverk og video-on-demand. Telekommunikasjon. | 48 milliardar dollar | Selskapet satsar på breiband. Tilbyr GoITV på kabelnettverket med fotball frå Latin-Amerika og Europa. |
9 | Sony | Japan | Film, musikk og spel. Lyd, video og tv. Produksjon og distribusjon. | 35 milliardar dollar | Selskapet er det tredje største i Japan innan forbrukarelektronikk. |
10 | Amazon | USA | Netthandel, video- og strøymetenester og skytenester. | 33 milliardar dollar (2019) | Selskapet er store på netthandel. |
12 | Viacom | USA | Tv-stasjonar, radio, tv-produksjon, utandørsannonsar og bøker. | 25 milliardar dollar | I 2019 blei CBS og Viacom slegne saman. 22 % av det som blir konsumert på tv i USA, går via deira kanalar/plattformer. |
13 | Netflix | USA | Strøymeteneste for filmar m.m. | 25 milliardar dollar | Ved utgangen av 2020 hadde selskapet 204 millionar betalande abonnentar globalt. |
15 | News Corp. | USA | Aviser, bøker, filmproduksjon og tv. Produksjon. | 21 milliardar dollar (2019) | Hovudeigar er Rupert Murdoch. Fox News er den viktigaste nyheitskanalen i USA. |
18 | Bertelsmann | Tyskland | Bøker, programvare, tv-kanalar, radiostasjonar og aviser. | 19 milliardar dollar | Bertelsmann er Europas største medieselskap. Etablert i 50 land med over |
27 | Discovery | USA | Produsent av tv-innhald og distributør av dette innhaldet. | 11 milliardar dollar | Selskapet distribuerer tv-program på 38 språk til 170 land. |
35 | Spotify | Sverige | Strøymeteneste for musikk. | 8 milliardar dollar | Selskapet er svensk og blei lansert i 2008. Hadde 144 millionar betalande abonnentar og 320 millionar aktive brukarar (inkludert gratisversjonen) |
Kjelda til tabellen er IfM: Media Data Base.
Studer tabellen
Sjå på oversikta over dei største medieselskapa i tabellen.
Kan du finne døme på selskap der mediedistribusjon har blitt kjernen i verdiskapingsprosessen?
Enorm omsetning og tett eigarskap
Dei største medieselskapa omset for enorme summar. Verdien av dei fire store selskapa Apple, Amazon, Alphabet og Meta er større enn Frankrikes brutto nasjonalprodukt (BNP). Selskapa har med andre ord stor økonomisk makt.
Åtte av dei ti største globale aktørane i medieverda i dag kjem frå USA. Mange av dei store medieselskapa har dei same aksjeeigarane, dei eig delar av kvarandre, og dei har styreselskap som samarbeider. Selskapa er òg tett knytte til andre nettverk innan finans, teknologi, kultur og politikk.
Samtidig ser vi at det her er ulike typar medieselskap vi snakkar om. Selskap som Apple og Microsoft er typiske teknologiselskap. Alphabet og Meta er teknologiselskap som får hovudinntektene sine frå annonsar. Andre selskap, som Comcast, Disney og News Corp., er store produksjonsselskap. Men i stor grad er dei alle medieselskap som har eit breitt spekter, frå produksjon til distribusjon av innhald.
Kjelder
Aalen, I. & Iversen, M.H. (2021). Sosiale medier. Fagbokforlaget.
Institute of Media and Communication Policy (IfM). Media Data Base. Henta 10. desember 2021 frå https://www.mediadb.eu/en.html
Kalsnes, B. & Pettersen, L. (2019). Algoritmer, analysedata og automatisering i det digitale medielandskapet – en avkledningsmanøver. Norsk medietidsskrift, 26(01), 1–10.