Bli ein opplevingsvert med Airbnb!
På nettsida til Airbnb finn du informasjon om korleis du kan bli vertskap for ei oppleving på Airbnb. Du kan faktisk tene pengar på å ta med turistar og andre på aktivitetar du elskar!
Les korleis de kan bli vertskap for ei oppleving på Airbnb.
Diskuter kva aktivitetar de elskar, og som de kunne ha tenkt dykk å tilby på Airbnb. Det kan vere aktivitetar eller opplevingar som krev personleg oppmøte, eller som er nettbaserte.
Bli einige om ein aktivitet eller ei oppleving.
Lag ein plan for korleis den valde aktiviteten eller opplevinga kan bli ei reiselivsoppleving for andre. Planen må innehalde ei skildring av
temaet for opplevinga
kvalitetsstandardar for opplevinga
Temaet kan til dømes vere natur, camping, dyr, kunst, kultur, sightseeing, sport, matlaging, matsafari, underhaldning eller noko anna. Kvalitetsstandardane skal beskrive ekspertisen dykkar, kva for nokre lokale sider ved aktiviteten dykkar som gir ei unik oppleving, og korleis de får deltakarane til å kjenne seg velkomne og trygge. Les meir om kvalitetsstandardane for opplevinga i den engelske artikkelen om dei tre grunnpilarane i ei god oppleving hos Airbnb.
Lag ein presentasjon av forslaget dykkar. Hald presentasjonen for klassa og få tilbakemeldingar.
Reflekter i fellesskap over fordelar og ulemper med sjølvstendige vertar for ulike aktivitetar og opplevingar i reiselivstilbodet. Ville de sjølve ha nytta dykk av eit slikt tilbod?