Hopp til innhald
Oppgåve

Å leve med hjartesjukdom

Å få ein hjartesjukdom kan føre til at den enkelte må gjere nokre endringar i livsstilen sin. I denne oppgåva kan du utforske korleis vi kan trene for å styrke hjartet, og du får høve til å lage ein informasjonsfilm om hjartevennleg livsstil.
Eldre par med tandemsykkel studerer eit kart. Foto.
Å vere fysisk aktiv er fullt mogleg og òg viktig sjølv om du har ein hjartesjukdom. Fysisk aktivitet gir ei rekke fordelar. Det aukar blodsirkulasjonen og reduserer risikoen for hjarte- og karsjukdommar og førebygger høgt blodtrykk og depresjon. Det aukar uthald og muskelstyrke og gir deg fysisk og psykisk overskot og betre livskvalitet. Bilete: Johner Images / CC BY-NC-SA 4.0

Oppgåve 1. Hjartevennleg livsstil

Last ned Hjertekampen-appen som er utvikla av LHLs legar og fysioterapeutar for å betre hjartehelsa, eller bruk nettsida Hjertekampen.

Bli kjend med appen eller nettsida.

  1. Start med di eiga helse. Jobb åleine eller i ei gruppe. Vel nivå i appen og gjennomfører nokre av øktene i programmet. Alle må ha med oppvarming og avslutning i øktene. Bruk gjerne ein skuletime til gjennomføring av øktene.

  2. Bruk appen eller nettsida og lag eit treningsprogram for ein eldre inaktiv person som òg har vore lite aktiv tidlegare. Treningsprogrammet skal strekke seg over fire veker. Hugs alltid oppvarming og avslutning.

  3. Refleksjonsspørsmål:

  • Kvifor er trening viktig ved hjartesjukdom?

  • Korleis kan du rettleie og motivere personar som har vore lite aktive tidlegare, til å trene?

Oppgåve 2. Informasjonsfilm om hjartevennleg livsstil

Det er mykje vi sjølve kan gjere for å førebygge hjarte- og karsjukdom og betre hjartehelsa vår.

Lag ein informasjonsfilm om hjartevennleg livsstil. Filmen skal beskrive ein hjartevennleg livsstil og gi nokre tips på vegen til ein sunnare kvardag. Tips til tema og innhald i filmen:

  • enkel sjukdomslære (hjarte og hjartesjukdom)

  • endring og motivasjon

  • kosthald

  • fysisk aktivitet

  • stress og stressmeistring

  • viktigheita av å slutte å røyke

  • å leve med ein hjartesjukdom

Oppgåve 3. Utforsk rehabiliteringstilbodet der du bur

Søk på nettet og finn ut kva rehabiliteringstilbod personar med hjartesjukdom har i kommunen din eller i fylket ditt.

  1. Lag ei oversikt over dei ulike tilboda.

  2. Korleis går søknadsprosessen og inntaket til dei ulike tilboda føre seg?

Oppgåve 4. Refleksjon

Hjarterehabilitering er sterkt tilrådd, men likevel deltek ikkje alle pasientane på dette.

  1. Kva tenker du kan vere årsak til dette?

  2. Kva tenker du kan gjerast for at fleire pasientar skal få tilbod om å delta på rehabilitering? Diskuter i klassen.