Forarbeid
- Finn eit eigna lokale i nærområdet ditt. Det kan vere eit tomt lokale eller ein stad der det allereie er ei bedrift og du ønskjer å gjere ei fasadeendring. Vel gjerne eit bygg som i utgangspunktet har vore brukt til noko heilt anna, som eit nedlagt industribygg, eit naust eller annan eldre busetnad. Bygningar som har spennande arkitektur, som er moderne, eller som har tydelege referansar til ein stilepoke, er òg gode utgangspunkt.
- Fotografer fasaden av ditt valde lokale. Ta fleire bilete frå ulike vinklar. Ha både oversiktsbilete der heile fasaden viser, og nærbilete av til dømes inngangsparti eller vindauge.
Målgruppe
Målgruppe er ei gruppe eller ein kategori av personar som har nokre fellestrekk. Målgrupper blir danna ved at du deler menneske inn i grupper ut frå ulike kriterium som kjønn, alder, utdanning, livsstil og forbruksmønster. Før du byrjar på planlegging av fasaden, må du ta stilling til kva målgruppe butikken eller kafeen skal ha. Kven skal salet vende seg til?
Sortiment
Det andre du må tenkje på, er kva sortiment bedrifta skal tilby. Kva varer eller tenester skal butikken eller kafeen selje? Det er viktig at sortimentet passar til den valde målgruppa.
Service og stad
Det siste du må ta stilling til, er kvar og korleis butikken eller kafeen skal selje tenesta eller produkta sine. Dette handlar om kvar lokalet ligg, kva opningstider ein skal ha, eller korleis ein skal møte kundane sine. Om det skal vere sjølvbetening eller personleg service, avgjer kor mange tilsette bedrifta må ha.
Oppgåve
- Bruk fotoa dine som utgangspunkt. Du kan jobbe digitalt i eit biletredigeringsprogram eller eit 3D-program, lage ein kollasj, teikne eit forslag eller byggje ein modell.
- Lag ein visuell profil for butikken eller kafeen. Du må velje fargar, skrifttypar, materiale og uttrykk. Kanskje ønskjer du å skape eit heilt bestemt konsept? Du må velje eit namn og utarbeide ein logo.
- Visualiser digitalt eller for hand, i ein kollasj, på ei teikning eller i ein modell korleis fasaden skal sjå ut. Legg inn logo, skilt, dekor og eventuelt andre element som uttrykkjer identitet og profil.
- Presenter løysinga di for resten av klassen.
Relatert innhald
.