Reisa frå mjølposen til ferdig bakverk
For å få kontroll på kva du har i deigen din, er det viktig å vite korleis du bereknar ingrediensane. Det er viktig å bake på premissane til mjølet. Det er mjølet som skal utvikle seg i deigen, og derfor blir det nytta som utgangspunkt. Oppskrifta tek utgangspunkt i prosent av total mengde mjøl og korn. Når du veit kor mykje mjøl du kan nytte, er det lett å rekne ut kva du treng av dei andre ingrediensane.
Her er eit døme:
- 200 g sammale rug, fin
- 200 g havregryn
- 150 g sammale kveite, grov
- 450 g sikta kveitemjøl
Totalt: 1000 g mjølmengd. Dette skal vi nytte som utgangspunkt for å rekne ut resten av ingrediensane.
- salt: 1,5 prosent blir 15 g
- gjær: 1 prosent blir 10 g
- olje: 3 prosent blir 30 g
- vatn: 75 prosent blir 750 g
Når vi reknar ut kor mykje grovt mjøl det er, ser vi at det er 550 g. Dette blir delt på den totale mjølmengda, og då veit vi at det er 55 prosent grovt mjøl.
Når du har lært deg dette, vil det gi deg ein mykje større fridom og kontroll over bakinga.
Oppgåve
Du får følgjande oppskrift:
1500 g mjøl
Du bestemmer sjølv kor mykje av mjølmengda som skal vere grovt.
Rekn ut i gram kor mykje vatn (75 prosent), gjær (1 prosent), feitt (3 prosent) og salt (1,5 prosent) det skal vere i denne oppskrifta.