Fargen på skalet er vanlegvis svart eller mørkt fiolett, men auberginar finst òg i fleire andre fargar, som kvit, raud, lilla og gul. Konsistensen er svampaktig, tørr og mjuk, og fruktkjøtet er kvitt med ei rad små kjernar. Smaken er mild, men auberginar må etast tillaga og ikkje rå.
Bruksområde
Før vi nyttar auberginen, bør vi skjere han opp i tjukke skiver eller dele han i to halvdelar og drysse på salt og tilsetje nokre dropar sitron. Då får vi best resultat og unngår ein bitter smak. Skyl av salt og sitron etter 15 minutt.
Aubergine kan nyttast til salat etter forvelling, til gryteretter, og som ingrediens i moussaka eller ratatouille. Han blir også nytta som grønsak til italienske og orientalske retter og i supper. Aubergine kan delast i to og forvellast og deretter fyllast og gratinerast i omn, eller han kan bakast heil.
Næringsinnhald
Aubergine er kalorifattig. Han inneheld noko A-, B- og C- vitamin og dessutan litt kalsium og jern.
Les meir om næringsinnhaldet i Matvaretabellen frå Mattilsynet.
Kvalitetskrav
Aubergine skal vere fast og blank med jamn mørk fiolett farge. Stilken og begerblada skal vere lysegrøne med ein frisk utsjånad utan uttørking. Idealvekta er frå 400 til 750 g.
Hugselappen
Med andre ord:
latin: Solanum melongena
engelsk: eggplant
tysk: Aubergine
fransk: aubergine
Lagring:
8–10 °C. Haldbarheita til auberginen er avhengig av temperaturen og etylen-mengda i lufta. Dersom lagringa er ideell, kan aubergine halde i over to veker. Han er også betre verna mot uttørking når han er pakka i plast.