Så seint som i 1980-åra bestemte ein bonde i New Zealand seg for å satse på denne frukta og tok patent på namnet Kiwano. Namnet er eit registrert varemerke, men frukta blir no produsert fleire stader under andre namn, mellom andre melano og pepano.
Eigenskapar
Fruktkjøtet er vakkert grønt og veldig saftig og inneheld mange små frø. Konsistensen kan minne litt om agurk. Smaken er mild, frisk og sursøt og kan skildrast som ei blanding av melon og agurk med ein snev av lime og banan. Utvendig har frukta eit gult, lêraktig skal med små piggar eller horn. Når frukta er mogen, er skalet guloransje. Forma er oval, og frukta kan bli 10–15 cm lang.
Bruksområde
Frukta kan skjerast opp på langs, og vi nyttar skei for å få ut fruktkjøtet. Vi kan også dele frukta i skiver og behalde det dekorative skalet på. Kiwano er ideell til å mikse i drinkar og fruktbollar. Han kan blandast med anna frukt i til dømes ein eksotisk fruktsalat. Den milde smaken gjer at Kiwano også passar fint i rekecocktail, eller han kan rørast inn i naturell yoghurt som eit lite mellommåltid.
Næringsinnhald
Kiwano er kalorifattig, han er rik på kalsium og magnesium, og han inneheld litt C-vitamin. Han eignar seg fint som slankemat.
Sjå Matvaretabellen frå Mattilsynet for nærare opplysningar om næringsinnhaldet.
Kvalitetskrav
Kiwano skal vere heil og fast utan sprekkar eller andre ytre skadar. Frukta skal vere jamt guloransje utan brune eller mørke flekker.
Hugselappen
Med andre ord:
latin: Cucumis metuliferus
engelsk: kiwano, horned melon, jelly melon
tysk: Kiwano, Afrikanische Gurke
fransk: kiwano, cocombre africane
Lagring:
15–20 °C. Kiwano skal lagrast på same måten som bananar. Dei skal ikkje på kjøl, og dei skal ikkje utsetjast for trekk eller etylenproduserande frukt.