Daddel er ei steinfrukt med ein avlang, hard kjerne. Frukta er oval i forma og ca. 3–5 cm lang. Skalet er tynt og sprøtt, blankt og brunt i fargen og kan etast. Sjølve fruktkjøtet er gulbrunt og smaker søtt. Dadlar blir etne både ferske og tørka, men det meste som blir selt i Noreg, er tørka. På grunn av det høge sukkerinnhaldet er dadlar ofte klisne.
Bruksområde
Dadlar er gode å eta naturelle som snacks. Dei kan delast og reinskast og takast med i fruktsalatar, som kakefyll eller i pai. Den søte smaken er ein spennande kontrast i skinke- og ostesalat. Dei kan også nyttast til konfekt. Ta ut kjernen og fyll holrommet med marsipan eller mandelmasse og dypp daddelen i smelta sjokolade. Strø på med kokosmasse.
Næringsinnhald
Daddelen er viktig i ernæringa i dei landa frukta kjem frå. Ho er kaloririk og inneheld A- og B-vitamin i tillegg til mineral: særleg kalium, kalsium, fosfor og jern. Sidan frukta berre inneheld 27 prosent vatn, kan vi sjå ho som eit konsentrert protein-, vitamin-, fruktsukker- og fibertilskot.
Sjå Matvaretabellen frå Mattilsynet for nærare opplysningar om næringsinnhaldet.
Kvalitetskrav
Dadlar skal vere blanke i skalet utan sprekker eller andre skadar. Dei må ikkje vere uttørka.