Mango

Det finst over tusen sortar mango, og storleiken varierer frå 100 gram til fleire kilo. Mango er anten rund, oval eller hjarteforma. Fargen på skalet varierer mellom grønt, gult og raudt, og fruktkjøttet er guloransje og svært saftig. Inne i frukta er ein flat stein som heng fast i fruktkjøttet, og som må skjerast ut med kniv.

Vi må dele mango før bruk. Vi kan ete han naturell, i dessert eller som tilbehøyr til ulike retter. Den spesielle, kraftige og søte mangosmaken passar godt til kjøtt, fugl eller fisk. Vi kan òg mose mango til saus og tilsetje litt sukker. Det er nydeleg til is. Mangochutney blir gjerne laga av umogen mango.

Mango er svært rik på vitamin A og inneheld dessutan ein del vitamin C og mineral.

Sjå Matvaretabellen frå Mattilsynet for nærare opplysningar om næringsinnhaldet.

Mango kan ha ulike fargar i skalet. Fargane seier ikkje noko om mogningsgraden, så han kan godt vere mogen sjølv om han er heilt grøn. Mogen mango skal gi lett etter for trykk og duftar sterkare enn mango som er hard og umogen. Mogen frukt kan ofte ha små, svarte prikkar i skalet. Det indikerer at sukkerinnhaldet er høgt. Skalet skal vere fast og glatt utan teikn til mørke flekker eller ròte. Ein heilt mjuk mango med litt skrukkete skal treng ikkje vere dårleg, men det er eit teikn på at han er etemogen.

8–12 gradar. Kor haldbar mangoen er, kjem an på kvar han er i mogningsprosessen. Ein mogen mango har kortare haldbarheit enn ein umogen. Umogen mango bør lagrast i romtemperatur for at han skal mognast raskare.

I den korte filmen under kan du lære meir om mango og få tips til korleis du kan lage til og servere han.