Hopp til innhald
Oppgåve

Reklamekampanje for å redusere økologisk fotavtrykk

Berekn ditt økologiske fotavtrykk, og diskuter med andre korleis du kan redusere det. Bruk innsikta de har fått, til å utarbeide ein kampanje for å få folk til å registrere og redusere sitt økologiske fotavtrykk.
Ungdommar sit på golvet med ein stor plakat om økologisk fotavtrykk framfor seg. Foto.
Ungdommar jobber med økologisk fotavtrykk. Bilete: Shutterstock / Avgrensa bruksrett

A) Førearbeid

Søk: Finn definisjonar av økologisk fotavtrykk. Fullfør setninga: «Eit økologisk fotavtrykk er …»

Ta testen! Finn ut kva som bidreg mest til ditt økologiske fotavtrykk, ved å svare på spørsmål om forbruket ditt av varer og tenester i testen «Sjå ditt fotavtrykk» på footprint.ducky.eco.

Tenk: Kva faktorar påverkar det økologiske fotavtrykket ditt mest? Lag eit tankekart.

Par: Vis tankekartet ditt til ein annan. Finn likskapar og forskjellar.

Del: Diskuter i klassen. Korleis kan vi redusere dei økologiske fotavtrykka våre?

Relevante spørsmål å diskutere

  • Kvifor må du oppgi den samla hushaldsinntekta, trur du?

  • Undersøk kva som ligg i kategorien «Offentleg».

  • På kva område har du eit høgare forbruk enn gjennomsnittet?

  • På kva område vil det monne mest at du reduserer?

  • Å reise med fly bidreg til 0,28 kg CO2-ekvivalentar per kilometer per passasjer per år. Finn ut kvar du kan fly om heile forbruket ditt bestod av å reise med fly.

B) Planlegg ein kampanje, lag medieuttrykk, og køyr kampanje

Klassen har fått i oppdrag av ducky.eco å lage ein reklamekampanje for tenesta deira som registrerer økologisk fotavtrykk. Det overordna føremålet er få folk til å redusere sitt eige økologiske fotavtrykk.

  • Definer målgrupper.

  • Bruk idémyldring for å få fram poeng eller historier som skal vere gjennomgåande i kampanjen.

Mogleg avgrensing

Vel ut eitt eller to tiltak som bidreg til å redusere utslepp. Formuler mål som er både realistiske og konkrete. Kva historier eller poeng kan fengje mottakarane?

  • Vurder ulike kanalar, reklameuttrykk og format de skal lage. Ein kampanje kan bestå av filmar laga for TV og i ulike kanalar på nettet, i tillegg til innhald til sosiale medium, annonsar og banner for å nemne noko.

  • Lag ein felles kampanjeplan i eit fellesdokument. Tips til kampanjeplan: Kampanjeplan for lansering av produkt.

  • Bli samde om ein stilart de legg til grunn, med gjennomgåande fargar og skrifttypar. Bli òg samde om de skal ha bilete, karakterar, objekt eller andre element som skal gå att i medieuttrykka.

  • Fordel arbeidet i mindre grupper.

  • Køyr produksjon.

  • Sørg for at alle reklameuttrykka er publiseringsklare når de leverer.

Tre strekpersonar sit rundt eit bord. To av dei har laptopar, den tredje gestikulerer og pratar. Illustrasjon.
Bilete: Siren Halvorsen / CC BY-SA 4.0

C) Evaluer

Vurder reklameuttrykka de har laga, og diskuter – i grupper eller i klassen – i kva grad de har lykkast med

  • å definere målgrupper

  • å skape ei tydeleg rammeforteljing og tydelege poeng

  • å lage ein estetisk heilskapleg kampanje

  • å få mottakarane til å registrere og redusere sitt eige økologiske fotavtrykk

Relatert innhald

Fagstoff
Lag ein idébank

Idébank er ein kreativ metode som er god for deg som blir friare når du slepp å seie idéane høgt, men heller kan skrive dei ned anonymt.