Arbeidsoppdrag
Feltarbeid: lyng
Lyng er nøkkelplantar i fjellet. I den lågalpine sona veks fleire lyngartar saman og kan dominere plantedekket mange stader. Lyng trivst i gammal og næringsfattig jord, og lyngfrøa kan ligge i jorda i mange år før dei spirer.
I denne oppgåva skal de bli kjende med nokre lyngartar og undersøke veksten av lyng i ekskursjonsområdet dykkar.
Bilete: Marta Dahl Grotheim / CC BY-SA 4.0
Når de kjem opp på fjellet, vil de fort sjå at det her veks mykje lyng. Vel ut eitt eller fleire område.
- Marker ei rute på 4 x 4 meter (eventuelt større) med tau og pinnar i hjørna i kvart område, og registrer kva for lyngartar de finn innanfor ruta.
- Lag ei oversikt over kva artar som dominerer. Om de vil, kan de lage ein skala frå 1 til 5, der 5 betyr svært dominerande, og 1 betyr spreidd vekst. Er det ein eller fleire lyngartar som dominerer tydeleg?
- Greier de å artsbestemme nokon av lyngartane de finn, ved hjelp av bestemingsnøkkelen?
Ein student fotograferer røsslyng på ekskursjon i fjellet. Bilete: Alf Jacob Nilsen / CC BY-SA 4.0Fotografer lyngartane, lyngblomstrane og fruktene, og ta eit oversiktsbilete av ruta.
- Ta notat, og samle inn eit par eksemplar av kvar lyngart frå ruta.
- Registrer òg andre plantar som dominerer i ruta.
Grav eit hòl i jorda inni ruta, og finn ut korleis jordsmonnet er.
- Er det fuktig eller tørt?
- Er jordsmonnet djupt eller grunt?
- Er jordsmonnet likt i heile ruta?
- Er det mykje stein?
- Kor vindutsett er området?
Til ekskursjonsrapporten
- Forklar metoden de brukte for å undersøke lyngvegetasjonen.
- Presenter dei ulike artane av lyng de fann, og sei korleis dei dominerte ruta. Samsvarte funna med det de hadde forventa?
- Vis bilete av dei ulike lyngartane, og lag ein kort omtale av dei basert på observasjonane dykkar og på opplysningar de finn i andre kjelder (hugs kjeldetilvisingar).
- Prøv å knyte veksten av lyng til jordsmonnet og grada av eksponering.
- Presenter resultata for klassen.