Føremål
I denne oppgåva skal de lage ei kort beskriving av området de skal gjere feltarbeid i.
Bruk kart
Før klassen dreg på ekskursjon, merkjer de av området på eit kart og bereknar kor stor lokaliteten er. Eit godt hjelpemiddel er digitale kart. Eit anna nyttig hjelpemiddel er ein GPS. Med GPS-en kan de finne nøyaktig posisjon, høgd over havet og himmelretningar, og på det digitale kartet kan de lagre posisjonspunkt og seinare plotte løypa de har gått.
Utstyr
- kart over området, så detaljert som mogleg
- utskrift av digitale kart
- kamera/mobiltelefon
- GPS (eventuelt på mobilen)
- skriveunderlag
Framgangsmåte
Når de kjem fram til ekskursjonsområdet, kan de skrive nokre stikkord om korleis de opplever lokaliteten:
- Korleis ser det ut rundt dykk?
- Korleis er topografien?
- Korleis er vegetasjonen? Ser de nokon tre? Synest de at ein eller fleire typar vegetasjon dominerer sterkt?
- Korleis er vêret?
- Korleis er temperaturen?
- Kvar kjem vinden frå? Er det ly for vinden nokon stader?
- Kan de sjå is og snø?
- Kan de finne ut nøyaktig kvar de er? Kan de finne himmelretningane (nord, sør, aust, vest)?
- Kor høgt over havet er de? Kva er posisjonen dykkar?
- Ser de nokon fjellvatn? Korleis ser dei ut?
- Kan de sjå spor etter menneskeleg aktivitet?
Ta med alt de synest er viktig, men skriv kort. Seinare kan de reinskrive notata til ekskursjonsrapporten. Ta nokre oversiktsbilete, og lag nokre skisser. Desse vil passe godt i ekskursjonsrapporten.
Til ekskursjonsrapporten
- Ta med alt de fann ut om området, og alle parametrane de registrerte i rapporten. Pass på å få med eit kartutsnitt og nokre oversiktsbilete.
- Merk av på kartet kvar klassen gjorde dei ulike feltoppgåvene. Om de har brukt GPS og lagra posisjonspunkt på han, kan de plotte løypa og feltstasjonane på eit digitalt kart.
- Beskriv korleis de ut frå kartet kan tolke terrenget i ekskursjonsområdet.
- Presenter innhaldet i rapporten for klassen.
Relatert innhald
Nettside hos kilden.nibio.no