Det er mange ulike aktørar, både private og offentlege, som kartlegg ulike område innanfor reiselivet i Noreg. Nokre av dei største er Innovasjon Norge Reiseliv, Statistisk sentralbyrå og NHO Reiseliv. I tillegg er det nokre forskingsinstitusjonar som kartlegg på oppdrag.
Visit Norway Innsikt
Kvart år intervjuar Innovasjon Norge tusenvis av norske og utanlandske turistar på ferie i Noreg. Målet er å kartleggje føremålet med reisa, korleis dei reiser og kven dei reiser saman med. I tillegg blir aktivitetar og pengebruk kartlagd. Kva er ønskte aktivitetar, kva blei gjennomført, og kor fornøgde var dei med aktivitetane? Funna blir publiserte i ein stor rapport og er eit nyttig verktøy for reiselivsaktørane i Noreg.
Turistundersøkelsen frå Visit Norway Innsikt
Statistisk sentralbyrå (SSB)
Fire gonger i året gjennomfører SSB Reiseundersøkelsen, som har som føremål å kartleggje reisevanane til nordmenn i Noreg og i utlandet.
Reiseundersøkelsen til SSB
NHO Reiseliv
NHO Reiseliv engasjerer mellom anna Telenor og Norsk Gallup til å gjennomføre ulike kartleggingsundersøkingar. Til dømes gjennomførte dei hausten 2019 ei kartlegging av reiseplanane til nordmenn for haustferien og hausten generelt. NHO Reiseliv publiserer resultat frå slike undersøkingar på nettsidene sine.
Tal og fakta frå NHO Reiseliv
Senter for reiselivsforskning
Senter for reiselivsforskning kartlegg forskings- og utviklingsbehovet for reiselivet i Innlandet. Føremålet med dette er å få betre kjennskap til kva tema og område aktørane sjølv vurderer som dei mest sentrale.
Reiserådgivingsteneste
MIMIR er eit døme på ei reiserådgivingsteneste som kartlegg og gjennomfører moglegheitsstudium, analysar og utgreiingar for reiselivet på oppdrag. Dei leverer rådgivingstenester både til private bedrifter og offentlege etatar, som Innovasjon Norge. Kjernekompetansen deira er:
reisemålsutvikling, markeds- og konseptvurderinger, opplevelsesdesign og attraksjonsutvikling, klyngeutvikling og prosjektledelse, samt ulike typer analyser og utredninger.
Kjelder
Visit Norway Innsikt. (u.å.). Turistundersøkelsen. https://business.visitnorway.com/no/turistundersokelsen/
Statistisk sentralbyrå. (2020, 28. april). Reiseundersøkelsen 2019. https://www.ssb.no/transport-og-reiseliv/artikler-og-publikasjoner/reiseundersokelsen-2019
Senter for reiselivsforskning. (2016, 22. november). Kartlegging av reiselivets forskningsbehov. https://www.reiselivsforskning.org/?s=kartlegging
MIMIR. (u.å.). Mulighetsstudier, analyser og utredninger. https://mimir.no/tjenester/?Article=33