Sørlandet er kjent for den flotte skjergarden sin, og her er det mange moglegheiter! Du har fått ein forretningsidé og skal lage ein forretningsmodell.
Innleiing
Sørlandet er kjent i Noreg for den flotte skjergarden sin med små uthamner, urørte holmar og skjer. Du jobbar i reiselivet og er sjølv veldig glad i å ferdast på sjøen, sove ute og vere på tur. Eit år var du på øyhopping i Middelhavet og likte det veldig godt. Du vil undersøkje moglegheita for å starte ei bedrift som organiserer øyhopping på Sørlandet. Du tenkjer pakketurar som inkluderer guide, havkajakk, telt/hengjekøye, utstyr, mat og drikke.
Førebuing
- Jobb i grupper på to eller tre.
- Jobb med plakatar, post-it-lappar og tusj.
- På plakaten teiknar de opp "Business Model Canvas" og bruker post-it-lappane til å skrive på og plassere i riktig "boks".
Bruk internett til å
- finne informasjon om skjergarden på Sørlandet og les litt om dei ulike stadene og kva moglegheiter som finst
- sjå andre tilbydarar av liknande tilbod, både på Sørlandet og andre stader i landet og bruk det du tenkjer er bra inn i prosjektet dykkar
- undersøkje moglege samarbeidspartnarar
Oppgåve
Del 1: Lag ein forretningsmodell for den nye bedrifta
Tips
Sjå den relaterte artikkelen "Forretningsmodellar i reiselivsnæringa" nedst på sida og les om "Business Model Canvas".
Del 2: Forklar og diskuter
- Forklar modellen dykkar for dei andre gruppene.
- Gi kvarandre innspel og tilbakemeldingar på modellane de har laga.
- Fyll på med post-it-lappar om det dukkar opp nye punkt til "boksane".
Relatert innhald
CC BY-SASkrive av Cathrine Meyer Johansen.
Sist fagleg oppdatert 16.12.2020