Hopp til innhald
Oppgåve

Kva ser du?

Ved å observere folk som handlar, kan du lære mykje om handlemønster og korleis folk tenkjer.
Lita jente ser på salsvarer på eit kjøpesenter. Foto.
Bilete: Stig Børre Elvegård / CC BY-NC-SA 4.0

Oppdrag

Du kan finne ut utruleg mykje om forbrukaråtferd berre ved å observere forbrukarar «in action». Svara du får, kan du bruke til å gjere kundeopplevinga endå betre.

Førebuing

  • Gå saman to og to.
  • Ring eller oppsøk ein butikk. Spør butikkleiaren eller nokon av dei tilsette om de kan få gjennomføre ei marknadsundersøking om forbrukaråtferd i butikken ved hjelp av observasjonsmetoden. Spør gjerne om det er spesielle spørsmål butikken kan tenkje seg å få svar på.
  • Avtal med butikken når de kan gjennomføre undersøkinga.
  • Lag sjølve undersøkinga, gjerne i form av eit avkryssingsskjema. Då blir det ikkje så mykje å skrive når de gjennomfører undersøkinga, og det blir lettare å analysere svara i etterkant. Analysen skal kunne vise konkrete resultat og eventuelle trendar.
Døme på kva de kan observere
  • Har kundane ei fast «rute» når dei kjem inn i butikken?
  • Tek dei på varene, og er det nokre varer kundane tek meir på enn andre?
  • Blir kundane trekte mot salshyller/salsreolar?
  • Blir dei trekte mot ei spesiell utstilling?
  • Ser det ut som dei er opptekne av pris?
  • Er det nokre fargar som tiltrekkjer kundane meir enn andre?
  • Prøver kundane varene?
  • Er det forskjellar mellom aldersgrupper?

Gjennomføring

  • Prøv å gjere dykk sjølve litt usynlege når de observerer, slik at ikkje kundane opplever det som ubehageleg.
  • Sjå på korleis kundane oppfører seg i butikken, og kryss av i skjemaet/undersøkinga.

Sluttføring

  • Analyser resultata når de kjem tilbake i klasserommet.
  • Lag ei oppsummering av det de finn, og sjå om de kan finne forbetringspunkt.
  • Send gjerne oppsummeringa til butikken.

Relatert innhald

Fagstoff
Observasjon i markedsføring

Observasjon som metode i marknadsundersøkingar kan være nyttig for ein marknadsførar. Med denne metoden ser du korleis forbrukarar handlar og samhandlar.