Case
Anne, Pål og Yasmin går på kokk- og servitørfag. Dei har bestemt seg for å starte ei ungdomsbedrift og vil selje tradisjonelle potetlefser bakte etter oppskrifta til Pål si bestemor. Dei har inngått ein avtale med ein lokal bonde om å nytte poteter som blir sorterte vekk på grunn av feil utsjånad eller storleik.
Dei er litt usikre på korleis dei skal få marknadsført og selt produktet sitt. Kan du hjelpe?
Bestemor sine lefser
Gir 18–20 stk.
Ingrediensar:
2 kg Beate-poteter
1,5 dl fløyte
100 g smør
1 ts salt
(1 ss lys sirup om ønskjeleg)
600 g kveitemjøl
Framgangsmåte:
Kok eller damp potetene møre med skalet på.
Fjern skalet mens potetene er varme. Bruk ei kjøtkvern eller potetpresse til å mose potetene i to omgangar.
Bland inn resten av ingrediensane, og kna alt saman. Deigen bør ikkje bli ståande, men nyttast med ein gong.
Del opp i emne på ca. 150 gram. Bruk eit kjevle med riller, og kjevle emna tynne på ein seglduk som er strødd med kveitemjøl.
- Steik lefsene på begge sider på ei takke.
- Dynk dei ferdige lefsene med litt vatn frå ei sprayflaske, og legg dei i eit fuktig klede. Lefsene kan frysast i plastposar.
Ta utgangspunkt i dei fem p-ane når du skal hjelpe dei:
Produkt: Kva er spesielt med dette produktet? Kvifor skal kunden velje dette produktet framfor produktet til konkurrenten? Kva kan det nyttast til? Korleis skal det pakkast, emballerast og merkjast?
Pris: Kva er ein passande pris på produktet? Kva metode bør dei nytte for å fastsetje prisen på produktet?
Påverknad: Korleis kan dei påverke kundar til å kjøpe produktet? Korleis kan dei kommunisere med potensielle kundar?
Plass: Kvar og når ville det vore lurt å selje dette produktet?
Personale: Kva slags kompetanse hos personalet eller leverandørane bør framhevast i samanheng med produktet?