Meirsal = plussal

Meirsal er det vi sel i tillegg til det kunden allereie har kjøpt eller hadde bestemt seg for å kjøpe. Eit typisk døme frå restaurantbransjen er ein kunde som kjem for å kjøpe ein enkel middag, og som endar opp med å kjøpe både middag og dessert fordi desserten var så freistande.

Innanfor kokk- og servitørfaga kan meirsal vere:

• Restaurantar: aperitiff til gjesten som ventar på mat, god vin til maten, dessert, drikke til kaffien med meir.
• Pizzarestaurant: dressing til pizzaen, ekstra fyll på pizzaen, ekstra drikke, bonuskort.
• Barar: snacks og nøtter til drikka, smårettar.
• Kaffibar: kaker til kaffien, posar med kaffibønner til heimebruk, aviser.
• Ferskvaredisk: tilbehøyr som passar til råvara, til dømes fløytegratinerte poteter ved sida av lammekjøtet eller kjeks og marmeladar til osten.

Meirsal oppstår altså når kunden bestiller og kjøper meir enn planlagt. Det er eit resultat av ein innsats frå service- og salsmedarbeidarar.

Restaurantbransjen kan i hovudsak auke salet på to måtar:

• auke beleggsprosenten
• selje meir til kvar kunde

Auka omsetnad gir betre lønnsemd for dei fleste verksemder innanfor hotell- og restaurantbransjen. Ein restaurant har eit visst tal stolar og bord som kan seljast. For kvart bordsete er det derfor viktig å selje flest mogeleg stolar til høgast mogeleg pris.

Di fleire plassar vi sel, di betre lønnsemd!

Alle medarbeidarar som har kontakt med gjestane, kan arbeide for meirsal. Til dømes kan både ferskvarehandlaren, bartenderen og servitøren selje direkte i samtale med kunden. Andre medarbeidarar gjer sin del av jobben ved å yte god service.

Kundane kjøper gjerne tilleggsytingar som dekkjer deira ønske og behov. Derfor må seljaren undersøkje kva for ønske kunden har. Spør ikkje om kunden ønskjer noko meir, men still spørsmål som peikar direkte mot tilleggsytingar:

• Skal det vere noko å drikke medan du ventar på maten?
• Ønskjer de påfyll av drikke?
• Kan det freiste med litt dessert?
• Ønskjer de kaffi til desserten?

Vi skal ikkje vere redde for å selje! Men det må gjerast på ein høfleg og ikkje påtrengjande måte. Peik på mogelegheitene, la kunden bestemme!

Dei fleste sal gir moglegheiter for meirsal. For å utnytte moglegheitene bør alle servicemedarbeidarar vere klar over rolla si og få opplæring i kva dei i praksis kan gjere.