Steinbit

Steinbiten vert kjønnsmoden i seks-årsalderen. Gytinga skjer i perioden november–februar på 40–200 meters djup, tidlegast i nordlege og seinast i sørlege område. Rogna vert lagd på botnen og deretter vakta av hannen.

Flekksteinbiten (Anarhichas minor) er meir utbreidd i arktiske strøk.

Fangsten av steinbit skjer med botntrål, botnline eller botngarn i Barentshavet og på dei nordnorske bankane. Det vert òg drive oppdrett på steinbit i dag.

Steinbit vert seld som ferske eller frosne filetar. «Ufisken» som folk ikkje ville ha, er i dag ein ettertrakta kulinarisk godbit. Han er fast i fisken og vi kan derfor gjere mykje med han på kjøkkenet. Han toler å bli kutta i strimlar og bitar, og kan steikjast i wok saman med grønsaker, krydder og kryddersausar. Steinbit kan steikjast, og på grillen er han enkel å handtera.

Steinbit er, som all anna fisk, rik på protein. Han er også ei god kjelde til vitamin A og B12.

Sjå Matvaretabellen frå Mattilsynet for nærare opplysningar om næringsinnhaldet.