Fagstoff

Makrell

Makrellen er ein hurtigsymjande fisk som om sommaren og utover hausten opptrer i store stimar langs kysten og ute i Skagerrak, Nordsjøen og i det sørlege Norskehavet. Han kan verta 20 år gammal, og livnærer seg hovudsakleg av småfisk som ungar av torsk, sild og brisling.

Utbreiing

Makrellen vert kjønnsmoden i tre–fire-årsalderen. Mot slutten av året vandrar den kjønnsmodne makrellen mot gyteområdet vest og sørvest for Irland, der gytinga startar i mars.

Fangst og fangstreiskapar

Fisket skjer hovudsakleg i sommarhalvåret. Fartøy som tek del i fisket, varierer frå båtar som driv med garn og dorg på kysten, til store, havgåande snurparar. Den årlege norske fangsten varierer betydeleg avhengig av kvotar og bestandssituasjon, men ligg vanlegvis på fleire titusen tonn.

Bruk

Makrellen vert seld som ferske og frosne filetar og som heil fisk. Det er mange produkt av makrell, mellom anna varmrøykt, kaldrøykt og peparrøykt makrell i tillegg til fleire variantar av hermetisk og påleggsmakrell i tomat. Fersk makrell kan steikjast, kokast eller grillast, og han eignar seg til graving. Steikt makrell med rømmesaus er ei velkjend delikatesse.

Stekt makrell med tilbehør. Foto. — Steikt makrell med nypotetsalat

Næringsinnhald

Om våren har makrell lågt feittinnhald (ca. 3 prosent), medan haustmakrellen kan innehalda opptil 30 prosent feitt og dermed store mengder omega-3-feittsyrer. Han er òg ei god kjelde til vitamin D og B12.

Sjå Matvaretabellen frå Mattilsynet for nærare opplysningar om næringsinnhaldet.