Brosme

Utbreiing og levevis

Brosma søkjer seg til harde og djupe område, og ho held seg gjerne på same staden gjennom heile livet. Brosma gyter mellom april og juni i eit område mellom Skottland, Færøyane og Island. Både egg og yngel flyt omkring like under overflata. Yngelen livnærer seg av plankton, medan vaksne brosmer lever av botnfisk og krepsdyr.

Bruk

Brosma vert seld som ferske eller frosne filetar eller lettsalta filetar. Brosma har eit fast fiskekjøtt med ein smak som kan minna om hummar, og ho kan lett lagast til i små stykke i woken. Kjøttet er saftig og fint, og i tillegg til steikte retter er ho veleigna i omnsbakte retter. Lettsalta filet kan kokast eller brukast som ingrediens i mange ulike retter.

Næringsinnhald

Brosma er ein mager fisk og ei god proteinkjelde. Ho inneheld òg mykje vitamin B12.

Sjå Matvaretabellen frå Mattilsynet for nærare opplysningar om næringsinnhaldet.

Fangst og fangstreiskapar

Det norske fisket skjer heile året, i nord hovudsakleg langs eggakanten til cirka 72° nord. Det vert òg teke litt brosme som bifangst i trål. Det er hovudsakleg banklineflåten frå Møre og Romsdal og Sogn og Fjordane som står for fisket i sør.