Oppgåve

Naturressursar i nærområdet ditt

Kva naturressursar finst eigentleg i nærområdet ditt? Kvar og korleis blir ulike naturressursar vunne ut? I denne oppgåva skal du kartlegge naturressursar i nærområdet og lære meir om ein valfri naturressurs.

Oversiktsbilete av ein tettstad i ein dal med skogkledde sider. I bakgrunnen er det eit vatn og fjelltoppar med snø. Moglege naturressursar er markerte på biletet. Desse er skog, vasskraft, fisk i innsjøen, jordbruk, mineral i berggrunnen, campingplass for turisme og fisk i fjorden. Illustrasjon. — Kva naturressursar finst i nærområdet ditt?

1. Lag eit kart over naturressursar i nærmiljøet

Denne oppgåva kan løysast ved hjelp av analoge kart eller ved bruk av digitale kartverktøy. Skal du jobbe digitalt, kan det vere nyttig å bruke artikkelen "Bruk av digitale kartverktøy".

Tips til læraren

Vi trur denne oppgåva kan løysast best ved at elevane teiknar på analoge kart mens dei leiter etter ressursar ved hjelp av ulike digitale kart og flyfoto frå Noreg i bilete.
Kart over eit valfritt område med målestokk kan skrivast ut på Kartverkets teneste norgeskart.no. Der kan de velje område, storleik på arket og type bakgrunnskart. Vi tilrår at de bruker gråtonekart i denne oppgåva.
Oppgåva kan utvidast og knytast til fleire tema i dette emnet (Ressursar og arealbruk). De kan til dømes diskutere kva for nokre av desse ressursane som er mest berekraftige. De kan òg jobbe vidare med kva for nokre av desse ressursane som i størst grad kan skape arealbrukskonfliktar.

Gjennomføring

Avgjer om du vil lage eit digitalt eller analogt kart.
Før du set i gang, kan det vere lurt å lese om kva naturressursar er i artikkelen "Naturressursar – livsgrunnlaget vårt".
Avgjer korleis du vil symbolisere dei ulike naturressursane, og tenk ut korleis du kan lage ei teiknforklaring. Naturressursane kan markerast ved hjelp av punkt eller ved å fargelegge/skravere område.
Teikn inn minst fem ulike naturressursar på kartet ditt.

Døme på korleis oppgåva kan løysast:

Eit gråtonekart over Straumen i Inderøy kommune der ulike område er skraverte og teikna over med ulike fargar, baserte på kva naturressursar som finst der. Landbruksjord er markert med gult, fjord og fiske er markert med blått, sterk straum og energi er markert med raudt, skog er markert med grønt, utsikt og turisme er markert med lilla. Illustrasjon. — Døme på korleis oppgåva kan løysast. Her er det brukt eit enkelt teikneprogram på pc (Paint) og teikna oppå eit gråtonekart henta frå norgeskart.no.

2. Fordjup deg i ein naturressurs

I denne oppgåva skal du velje éin naturressurs du vil lære meir om. Skriv ei oppgåve, lag ein multimodal tekst eller lag ein presentasjon. Bli einig med læraren om korleis oppgåva skal presenterast, og kor lang tid de skal bruke på oppgåva. Uansett presentasjonsform bør du bruke bilete og gjerne kart.

Du skal

presentere naturressursen og seie noko om kva type ressurs det er
forklare korleis naturressursen blir vunne ut, og kva han blir brukt til
presentere kvar naturressursen finst (lag gjerne eit kart og bruk det i oppgåva)
diskutere korleis naturressursen kan brukast på ein berekraftig måte

Forslag til naturressursar du kan fordjupe deg i

vind
bølger
sol
skog/tømmer
fisk
sand
råolje
silisium
jordsmonn/landbruksjord
kritiske mineral som kobolt, kopar, litium eller molybden