Oppgåve

Nærmiljøet ditt 2.0: Arealkonsulentane

Start eige konsulentselskap og finn ut kva som er den beste løysinga for utvikling av nærmiljøet. Klarer de å ta omsyn til naturfarar, naturressursar og andre naturgode? Og korleis skal de unngå konfliktar når de skal planlegge arealbruken?

De skal starte eige konsulentselskap og komme med eit forslag til korleis nærområdet kan utviklast.

Til læraren: Om puslespelmetoden

I denne oppgåva bruker vi puslespelmetoden, som òg blir kalla jigsaw-metoden eller ekspertgrupper.

Først jobbar elevane litt individuelt før dei går saman i ekspertgrupper. Kvar ekspertgruppe samarbeider om å setje seg inn i det same temaet.

Deretter skal elevane jobbe i andre grupper, såkalla basisgrupper, med ein elev frå kvar ekspertgruppe. Kvar elev på basisgruppa fungerer då som ekspert på kvart sitt tema når basisgruppa skal løyse ei større oppgåve.

Les meir om metoden i artikkelen "Ekspertgrupper".

Oppstart

Del dykk i basisgrupper med minst fire elevar i kvar gruppe. Kvar basisgruppe skal vere eit konsulentselskap som skal komme med løysinga si for nærmiljøet 2.0.
Fordel temaa under på medlemmene i gruppa. De skal no bli eksperten i konsulentselskapet på kvart dykkar tema.

Ekspert på naturfarar

Finn ut

Kva er naturfarar?
Kva naturfarar er relevante i nærområdet vårt, og kvar kan naturfarar skje?
Kva er ein risiko- og sårbarheitsanalyse?

Fagartiklar

Ekspert på naturressursar og naturgode

Finn ut

Kva er naturressursar?
Kva naturressursar finst i nærmiljøet vårt?
Kva er økosystemtenester?
Kva økosystemtenester er viktige i nærmiljøet vårt?

Fagartiklar

Ekspert på interesse- og arealkonfliktar

Finn ut

Kva er interessekonfliktar og arealkonfliktar?
Kva interesser finst i nærmiljøet dykkar?
Kva interessekonfliktar kan oppstå, og korleis kan de unngå dei eller argumentere for løysinga dykkar?

Fagartiklar

Ekspert på kart

Finn ut

Korleis kan du lage eit kart med eigne markeringar og innteikningar?
Kva kartverktøy vil du bruke, og kvifor?

Fagartiklar

Førebuingar

Individuelt arbeid

Fordjup deg i dei gitte artiklane og svar på spørsmåla under temaet ditt.

Tidsbruk: 20 minutt.

Ekspertgrupper

Set dykk saman i ekspertgrupper. Viss du har om kart, skal du no sitje saman med dei andre som òg har om kart (som då er frå andre basisgrupper/konsulentselskap).

Del det de har funne ut. Hjelp kvarandre med å forstå stoffet og bli ekspertar på temaet dykkar.

Tidsbruk: 10 minutt.

Deling og diskusjon i konsulentselskapet

Set dykk tilbake i basisgruppene og presenter for kvarandre det de har funne ut. Kvar ekspert får tre–fire minutt til å presentere sitt ekspertområde for dei andre.

Tidsbruk: 10–15 minutt.

Oppdraget til konsulentselskapet

No har de blitt ekspertar på kvart dykkar område. Dermed er konsulentselskapet klart for oppdraget "Nærmiljøet 2.0".

De skal no lage ein plan for bruket av areala i nærmiljøet der de får plass til

eit nytt idrettsanlegg
minst 50 nye bustader
meir bruk av ein naturressurs (gjerne ein som ikkje blir utnytta i området i dag)
eit nytt kjøpesenter eller noko anna som kan skape økonomisk aktivitet

Presentasjonen til konsulentselskapet

Sluttproduktet skal vere ein presentasjon som overtyder om at dykkar konsulentselskap har den beste planen for nærområdet. De må bruke fagomgrep, forklare kvifor de har valt dei plasseringane de har gjort, og argumentere for kvifor dette er ei god løysing.

Følgande må med i presentasjonen:

Kart som viser plassering. Her må de ha berekna den faktiske plassen slik at innteikningane er realistiske.
Bilete som viser korleis det skal sjå ut. Biletbruken bør gjere oss overtydde om at dette er eit nabolag vi vil ha. Søk gjerne opp bilete de kan bruke, på nettet.
Argument som overtyder oss om kvifor dette er ei god løysing. Bruk fagomgrep på ein måte som viser at de forstår dei. Planen må vere god og gjennomtenkt.
Fagomgrep som bør brukast: naturfarar, interessekonfliktar, naturressursar, naturgode og nedbygging av natur.
Andre aktuelle fagomgrep: flaum, skred, kvikkleire, landskapsverdiar, berekraft, samfunnsnytte, næringsinteresser, fortetting, grå areal, naturmangfald, naturforvaltning, økosystemtenester, grad av fornybarheit, ekspropriasjon og NIMBY.

Tips til bruk av KI

Presentasjonen skal innehalde nokre visuelle element i tillegg til kartet. Viss de ikkje finn bilete på nettet, kan de generere bilete ved hjelp av KI. De kan òg bruke KI for å lage logoen til konsulentselskapet (logoen øvst i denne oppgåva er laga ved hjelp av KI).

Hugs å bruke godkjende biletrobotar. NDLAs biletrobot finn du når du loggar inn på Min NDLA. Alle KI-robotane til NDLA er personvernsikre, tek omsyn til opphavsrett og er spesielt tilrettelagde for bruk i opplæring.