Meirsal, plussal
Meirsal er primært retta mot produkt eller tenester som saman med hovudproduktet kan gi ei betre totalløysing for kunden. I ein aktiv daglegvarebutikk legg dei til rette for meirsal ved å samplassere varer som naturleg høyrer saman, leggje fram brosjyrar, gi tips til middagar og så bortetter. Svært mange produkt byr på slike utsikter for meirsal. Det er ei utfordring for alle salsmedarbeidarar å finne produkt som høyrer saman, og rettleie kunden til å kjøpe meir.
Eit godt sisteinntrykk
Vi har lært at førsteinntrykket i kundekontakten er viktig. Eit godt sisteinntrykk er like viktig – det kan vere avgjerande for om kunden dukkar opp att for å handle.
Anten kunden har kjøpt noko eller ikkje, er sisteinntrykket viktig for korleis kunden oppfattar salsmedarbeidaren og butikken. På same måten som vi berre får éin sjanse til å gjere eit godt førsteinntrykk, får vi aldri ein tilleggssjanse til å gjere eit godt sisteinntrykk.
For kundar som har kjøpt
Tenk langsiktig. Om vi tenkjer på forholdet til kunden som livslangt, er det viktig å innkassere kvart sal som grunnleggjande, og som på sikt kan bli noko stort.
Dersom kunden kjøper, må vi alltid takke høfleg for handelen – same kor lite kunden har kjøpt. Kunden skal forstå at vi set stor pris på kvar ein handel. Ein liten kunde i dag kan bli ein stor kunde i morgon!
For kundar som ikkje har kjøpt
Dersom kunden ikkje kjøpte noko, kan vi prøve å få til ei avslutning som gjer at kunden får lyst til å kome attende til butikken vår seinare. Er det heilt tydeleg at kunden ikkje kjem til å kjøpe, bør vi snarast avslutte samtalen på ein hyggeleg måte. Ved avslutninga kan du seie at du forstår at det ikkje er aktuelt for kunden å handle nett no.