Bilete i kontekst

Hilde Honerud er kunstnar med fotografi som medium og førsteamanuensis i fotografi ved Universitetet i Søraust-Noreg. Over fleire år har ho teke bilete av menneske i flyktningleiren Moria på øya Lesbos i Hellas, og eit utval av bileta vart viste på ei utstilling på Nitja senter for samtidskunst våren 2022.

I filmen snakkar Hilde Honerud både om konkrete verkemiddel i bileta i utstillinga "GYM" og om den kulturelle, sosiale og situasjonsmessige konteksten for bileta. Vi kan seie at den visuelle kommunikasjonen i kunsten hennar spelar på kulturelle førestillingar som tilskodaren har om flyktningar. Å reflektere over den sosiale konteksten bidreg òg til tolkinga av bileta, som til dømes forskjellar i makt og status mellom fotograf og menneska som blir avbilda, og publikum.

Biletanalyse med fokus på kontekst

I ein analyse av bilete er det vanleg å konsentrere seg om motiv og verkemiddelbruk, slik som vinkling, utsnitt, linjer, fargar og lys. Ved å trekke inn konteksten for biletet kan du opne nye perspektiv.

Her er nokre analysespørsmål du kan bruke for å trekke inn både den situasjonsmessige, den kulturelle og den sosiale konteksten til bilete du skal analysere:

• Korleis blir menneske som er avbilda, framstilte? Gjer framstillinga menneska til noko framandarta, eller får ho deg som tilskodar til å kjenne nærleik og empati med dei som er avbilda?

• Representerer avbilda menneske ei gruppe, eller verkar dei som individ? Kva status opplever du at dei har?

• Kvar fotografen vel å peike kameraet, avgjer kva historie som blir fortald. Kva slags historie hadde biletet fortalt om kameraet hadde peika i ei anna retning i den same situasjonen?

• Er motivet i biletet oppstilt, eller er det fanga akkurat no?

• Korleis blir motivet vanlegvis avbilda? Utfordrar biletet etablerte førestillingar ved å framstille motivet på ein annleis måte, eller gjentek dei kjende motiv?

• Kva sjanger høyrer biletet til i? Er det til dømes eit motefotografi, eit dokumentarfotografi eller kunstfotografi? Kva sjangertrekk knyter du til sjangeren, og korleis rettar biletet seg etter desse?

• Korleis har tolkinga di av biletet endra seg frå førsteinntrykket til etter du har trekt inn og utforska konteksten til biletet?