Venstreekstremisme
Venstreekstremisme er ei nemning som blir brukt på ulike former for politisk aktivisme og radikalisme som høyrer til på den ytste politiske venstresida. Dette er grupperingar eller rørsler som spring ut frå ideologiar til venstre, som den demokratiske og parlamentariske sosialismen. Nemninga blir brukt om alt frå terrorgrupper til ikkje-valdelege aksjonar. Fleire av desse grupperingane er revolusjonære og ønsker å bryte med med det etablerte i samfunnet.
Idégrunnlaget for venstreekstremisme kan knytast til europeiske anarkister på 1870-talet, som meinte handling var viktigare enn ord. Angrep på maktpersonar og statsleiarar skulle vise at det var mogleg å gjere opprør mot maktstrukturar. På 1970-talet fekk venstreekstremisme igjen eit høgdepunkt. Denne gongen var opprør, terror og motstand knytt til avkolonisering, revolusjonære grupper i Latin-Amerika og studentopprør i Vest-Europa.
Fiendebiletet til venstreekstreme kan vere politiske motstandarar, maktapparat, politi, selskap, religion eller grupper som blir oppfatta som truande for det samfunnet desse ønsker seg. I Noreg er det gjerne motstand mot høgreekstremisme som samlar dei venstreradikale eller venstreekstreme.
Terror
På 1970-talet fanst det fleire ekstreme grupper på venstresida. Dei mest kjende var Raude Armé Fraksjon (RAF) i Vest-Tyskland og Dei Raude Brigadar i Italia som både skapte frykt og gjennomførte terroraksjonar i Europa.
Utforsk
Bruk internett, og finn døme på grupper eller rørsler som kan kallast for venstreekstreme.
Kjelder
Plattform. (2016, 10. oktober). Hva er venstreradikalisering? https://www.plattform.no/venstreradikalisering/hva-er-venstreradikalisering/
Sitter, N. (2022, 3. mai). Terrorisme. I Store norske leksikon. https://snl.no/terrorisme
Venstreekstremisme (2021, 19. februar). I Store norske leksikon. https://snl.no/venstreekstremisme