Skjering av kjøt til ferdig produkt

Denne oppgåva består av ein teoretisk del, ein produksjonsdel og ein salsdel.

De skal velje dykk eit dyr som tema for oppgåva og øve dykk på å skjere ned dyret i fine stykkingsdelar. De skal så velje ut nokre av stykkingsdelane som de vil klargjere for sal, lage til produkt og setje opp ein ferskvaredisk.

• Sjå filmen om grovoppdeling av det dyret som skal vere tema for oppgåvene. Filmane ligg i relatert innhald.

• Skriv om dei ulike stykkingsdelane på dyret og kva dei kan nyttast til.

• Vel fire stykkingsdelar som de vil selje i ein ferskvaredisk, og bestem dykk for korleis de vil presentere dei. Skal det vere råvarer som heile filetar, biffar og kotelettar, råvarer som er tilarbeidde med marinade eller krydder, farseprodukt eller heilt ferdige produkt som steikte karbonadar?

• Finn òg minst éi potettillaging, éin saus og to salatar/grønsaker som kan passe til kjøtet, og som kan seljast i ein ferskvaredisk.

• Korleis vil de marknadsføre ferskvareutsalet?

Saman med læraren skjer de kjøt og deler det i dei stykkingsdelane de bestemde på dag ein.

Produkta må emballerast og lagrast riktig. Set klare dei produkta som trengst til neste dag, og resten kan frysast inn for seinare bruk.

Ut frå stykkingsdelane frå dag to skal de lage produkt til ein ferskvaredisk. I tillegg til kjøttprodukt skal ferskvaredisken innehalde tilbehøyr i form av potettillaging, grønsaker og saus.

Alt blir merka, emballert og prisa riktig.

Gjer klar ferskvaredisken og tenk på korleis han skal sjå innbydande og flott ut. Hugs temperatur!

Om skulen ikkje har ein ferskvaredisk, kan de leggje opp produkta i bakkar med is for å halde riktig temperatur.

Under salet er det viktig å ha fokus på god kundebehandling og korleis få til meirsal av tilbehøyrsprodukta.