Tillaging av linser og bønner

Bønner kjem som regel tørka og må blautleggjast før bruk. I den seinare tida har kokkar rundt om i landet byrja å nytte ferske lokale feve-bønner, eller hestebønner, som er eit anna namn på dei. Desse bønnene får du ferske heile året, men då importerte frå andre land. Tørka bønner finst i mange fargar og storleikar. Du kan òg kjøpe ferdig kokte og hermetiserte bønner.

Linser er omtalte allereie i Første Mosebok, så her snakkar vi om ei historisk og gammal råvare. Linser er mest nytta i middelhavsregionen, Sør-Asia og Vest-Asia. Linser er ei av dei beste proteinkjeldene i vegetarmat. Næringsinnhaldet er det same som i bønner. Kor mange ulike typar farga linser har du smakt på?

Her finn du oppskrifter på ei frisk bønnegryte og ein mettande linsesalat som eignar seg godt både som mettingsgarnityr og som ein eigen vegetarrett.

Bønnegryte på norske hestebønner. Når bønnene er ferske, er dei grøne, nøtteaktige og blir lett misfarga viss dei blir kokte for lenge. Denne bønnegryta er frisk og lett, dette for å ta vare på den ferske smaken av bønnene.

Ingrediensar

• 100 g hestebønner som er tekne ut av belgen

• 100 g grøne erter

• 50 g kvite bønner

• 50 g gulrot i brunoise

• 50 g purrelauk i brunoise

• 50 g finhakka raudlauk

• 20 g finsnitta graslauk

• 20 g finsnitta persille

• 210 g kaldt smør i terningar

• 75 g kvitvinsreduksjon

• salt, svart pepar, sitron

Framgangsmåte

1. Legg dei kvite bønnene i 5 dl kaldt vatn, og la dei stå i 12 timar på kjøl.

2. Trekk dei kvite bønnene rett under kokepunktet i 35 minutt eller til dei er møre.

3. For å behalde den friske grønfargen på ertene og hestebønnene blir dei blansjerte kvar for seg i fosskokande vatn med salt i 1–2 minutt før du legg dei over i isvatn til dei er avkjølte. Ta dei så ut av isvatnet, og tørk godt av dei.

4. Kok gulrota og purreløken kvar for seg i 1–2 minutt før du legg dei over i isvatn til dei er avkjølte. Ta dei deretter ut av isvatnet, og tørk godt av dei.

5. Kok opp kvitvin og pisk inn det kalde smøret. Vend inn kvite bønner, hestebønner, erter, gulrot, purrelauk, raudlauk, graslauk og persille.

6. Smak til med salt, svart pepar og sitron.

Her er ein salat med linser som vi kan nytte som eit mettingsgarnityr eller som ein eigen vegetarrett. Her nyttar vi ferdig kokte linser. Skal du nytte tørre linser, kan det vere lurt å leggje dei i vatn i 15 minutt før du skal koke dei. Då får dei litt kortare koketid, og du får skylt godt av dei.

Koketid på linser er ofte ikkje meir enn 10–20 minutt.

Ingrediensar

• 2 pakker (ca. 960 g) grøne linser, ferdigkokte

• 150 g raudlauk, finhakka

• 1 granateple, kjernar

• 30 g persille, hakka

• 1 fedd kvitlauk, finhakka

• 2 ms kvitvinseddik

• 3 ms olivenolje

• 100 g fetaost, smuldra

• kajennepepar, salt, pepar, sitron

Bland alle ingrediensane i ein bolle og ha i fetaost til slutt.

Tips: Viss du vil gjere denne retten heilt vegansk, byter du ut fetaosten med tofu.

Voila!