Tillaging av kikerter

Kikert er ei belgfrukt med nøtteaktig smak. Kikerter er nytta på mange ulike måtar over heile verda. Fiberinnhaldet er høgt, og kikertene inneheld òg ei rekkje mineral.

Du kan kjøpe kikerter tørre og blautleggje dei sjølv, eller du kan kjøpe ferdig kokte. Når du skal vatne ut tørre kikerter, må du hugse å ha nok vatn, slik at kikertene blir riktig blautlagde. Kikerter tek til seg mykje vatn, ofte meir enn du trur.

Nyttar du hermetiske kikerter, kan du nytte kikertvatnet til å lage marengs eller majones. Då får du nytta mykje av råvara, og du bidreg til meir berekraftig matlaging og mindre matsvinn! Dette er òg eit godt tips om du får gjester med eggallergi. Du kan lese meir om bruk av kikertvatnet i NRK-artikkelen som ligg i relatert innhald.

Her finn du oppskrifter på to ulike tillagingsmetodar, ein som puré og ein der kikertene er heile. Begge eignar seg godt som mettingsgarnityr.

Hummus betyr "kikert" på arabisk, og det består av kokte kikerter, tahini, sitron og kvitlauk. Vi kan nytte hummus som pålegg, ein dipp eller som ein del av ein større rett.

For ein rett med så mykje historie er det ikkje rart at det finst mange ulike tillagingsmetodar. Her er ei oppskrift som fungerer veldig godt.

Ingrediensar

• 200 g tørka kikerter

• 800 g kaldt vatn til blautlegging

• 300 g vatn til koking

• 80 g tahini

• 40 g sitron

• 5 g finhakka kvitlauk

• 1 ts natron

• 1 ts salt

Framgangsmåte

1. Legg kikertene i vatn i 12 timar på kjøl.

2. Skyl kikertene godt. Ha kikerter, vatn, salt og natron i ein kjele og kok i 1,5 timar eller til kikertene er møre.

3. Avkjøl ertene i kokevatnet.

4. Bland saman sitron og tahini i ein bolle saman med den finhakka kvitlauken.

5. Køyr ertene opp i ein foodprosessor og spe med kokevatnet til ønskt konsistens. Vend ertene inn i blandinga av tahini, sitron og kvitlauk. Smak til med salt.

Chana masala er ein saftig bønnerett frå India. Retten er alltid kraftig krydra med koriander, spisskummen, gurkemeie og garam masala. Den blir servert med kulcha, eit mildt, syrna flatbrød, eller bhatoora, som er eit mjukt, luftig brød frå det indiske kjøkkenet. Chana masala blir ofte servert som festmåltid ved høgtider og eignar seg veldig godt som mettingsgarnityr til fisk, kylling, lam og svin.

Ingrediensar

• 200 g kokte kikerter

• 150 g kepalauk

• 3 fedd kvitlauk

• 40 g skrelt ingefær

• 40 g finhakka chili

• 2 ts malen koriander

• 1 ts spisskummen

• 1 ts garam masala

• 1 ts gurkemeie

• 400 g knuste tomatar på boks

• 2 ms nøytral olje

• 50 g kikertvatn (vatn frå koking av kikertene)

• sitron

• salt

Framgangsmåte

1. Blautlegg kikertene i godt med vatn i 12 timar på kjøl.

2. Steik løk, ingefær og chili med salt på medium høg varme til det er gyllenbrunt. Tilsett alle tørre krydder, og steik i 5–8 minutt til aromaene i kryddera kjem fram.

3. Tilset dei knuste tomatane, kok opp og la det trekkje rett under kokepunktet i ein time. Rør ein gong i blant.

4. Kok kikertene i vatn med salt og natron på høg varme i ein time.

5. Tilset kikertene i tomatsausen heilt til slutt. Smak til med salt og sitron.