Førsteinntrykket
Det første møtet vårt med gjesten blir ofte kalla for "sanningas augneblink". Førsteinntrykket er avgjerande for kunden si oppleving av service. Vi har berre éin sjanse til å gjere eit godt førsteinntrykk. Spolerer vi denne, får vi ikkje ein sjanse til. Førsteinntrykket vi har gitt kunden, kan vi aldri forandre på. Det er derfor viktig å gjere ein god jobb frå første stund.
Inngangspartiet
Gjesten sitt første møte med bedrifta er gjennom inngangspartiet. Er inngangspartiet reint og fint, og verkar det innbydande? Eit skitent og ustelt inngangsparti vil ikkje imponere nokon, og det kan føre til at gjestane vel ein annan plass å ete.
Ta imot gjesten
Når gjestane kjem inn døra, må vi raskt vere på plass og ønskje dei velkomen med eit smil. Vi må vise med kroppsspråket vårt at vi verkeleg set pris på at dei kjem på besøk. Ver blid og høfleg. Spør om gjestane har bestilt bord, og vis dei til plassane sine. Det er viktig at du som servitør har oversikt over aktuelle bordbestillingar. Borda må vi ha ordna på førehand, slik at dei passar med det talet gjestar det er bestilt bord til.
Fortel om dagens tilbod og gi menyen
Fortel gjestane om dagens tilbod, og gi dei menyar viss dei ønskjer det. Har kjøkkenet gått tom for eventuelle råvarer, bør du raskt informere om det. Dei fleste gjestar er forståingsfulle berre dei får informasjonen i god tid. Spør om gjestane ønskjer noko å drikke før maten (aperitiff). Gjestane ser på menyen, mens servitøren hentar eventuelle aperitiffar.
Som servitør er det viktig å vere førebudd og ha god oversikt over menyen. Gjestane har ofte mange spørsmål: Kva vil du anbefale? Har du noko glutenfritt? Finst det vegetariske alternativ? Når du står framfor gjestane, kan du ikkje springe inn på kjøkkenet for å få svar heile tida. Då verkar du lite profesjonell.
Ein servitør bør ha god kunnskap om både mat og drikke for å kunne rettleie gjestane. Kjem det spørsmål om allergiar, og du er usikker, skal du sjølvsagt spørje kjøkkenet. Spørsmål om allergiar må du ta på alvor. Her må du aldri ta sjansar.
Ta opp bestilling
Når gjestane har bestemt seg for menyen, kan du ta opp bestilling. Det er viktig at du hugsar kven som har bestilt kva. For at det skal vere lettare å hugse, kan du lage eit bordkart.
Døme på bordkart
Bord 5 | ||
|---|---|---|
Gjest 1: Kamskjel Breiflabb Sjokoladefondant Mineralvatn | Gjest 2: Kamskjel Biff Raudvin | Gjest 3: Fiskesuppe Breiflabb Sitronterte Kvitvin |
Gjest 4: Fiskesuppe Bakalao Kvitvin | Gjest 5: Kamskjel Breiflabb Sjokoladefondant Mineralvatn | Gjest 6: Kamskjel Breiflabb Sjokoladefondant Mineralvatn |
Ved å lage eit slikt bordkart får du full oversikt over kven som har bestilt kva. Det gjer det òg enklare viss gjestane vil betale kvar for seg etterpå. Gjenta alltid bestillingane til gjestane, slik at du er sikker på at du har fått med deg alt.
Etter at bestillinga er registrert og kjøkkenet har fått eventuelle beskjedar, kan du servere drikke til maten. Serverer restauranten brød og smør til gjestane, set du dette på bordet. Når maten er klar, er det servitøren si oppgåve å ta ein siste sjekk på tallerkenen for å sjå om han ser presentabel ut. Er det saus eller anna på kanten av tallerkenen, tørkar du det raskt av med ein fuktig klut.
Server maten, og hugs å spørje gjestane om det smakte. Dette skal du gjere etter at gjestane har teke to–tre bitar, ikkje etter at dei er ferdige med maten. Då har du moglegheit til raskt å rette opp eventuelle feil eller manglar ved maten.
Ver i nærleiken av gjestane
Avhengig av korleis standardoppdekkinga til restauranten er, og av kva gjesten har bestilt, kan det hende du må supplere med glas og bestikk undervegs. Hugs å etterskjenkje drikke. Ver alltid i nærleiken av gjestane, slik at dei har moglegheit til å få kontakt med deg om det skulle vere noko.
Det er ikkje alltid at gjestane bestiller dessert med ein gong. Etter at hovudretten er rydda, kan du spørje om det freistar med dessert og kaffi, eventuelt dessertvin og avec.
Ein vanleg feil mange servitørar gjer, er at dei forlèt gjestane etter at desserten er servert. Det kan nemleg hende at gjestane ønskjer ekstra drikke eller vil betale rekninga. Då kan det vere irriterande viss det er umogleg å få tak i servitøren. Det kan faktisk øydeleggje eit elles godt inntrykk av restaurantopphaldet.
Etter at gjestane har gjort opp rekninga, takkar du dei for at dei kom, og ønskjer dei velkomen tilbake.