For at arrangementet skal bli ein suksess, er det viktig å ha ein godt planlagd køyreplan. Sørg for at alle på kjøkkenet og i serveringa har lese grundig gjennom køyreplanen på førehand.
I eit bryllaup er det ofte talar og andre ting som skjer undervegs i måltidet. Når vi har sett opp ein tidsplan på dette, unngår vi misforståingar, og vi sikrar kvaliteten på mat og servering.
Når nokon av gjestane taler, skal ikkje servitørane gjere noko i lokalet, for det ville ha verka svært forstyrrande både for den som taler og gjestane. Det er òg ein god idé å leggje dei fleste talane til etter hovudretten. Nokre talar blir lengre enn berekna, og då er det betre at hovudretten er servert, slik at han ikkje blir øydelagd.
Her er eit døme på ein køyreplan frå eit bryllaup:
Tid | Hending | Diverse |
---|---|---|
15.00 | Gjestane kjem, servering av aperitiff i foajeen | |
15.20 | Tenne lys | |
15.25 | Setje ut vassmugger | |
15.30 | Gjestane set seg til bords | |
15.35 | Skjenkje kvitvin og alkoholfritt | |
15.45 | Toastmasteren ønskjer velkomen til bords | |
15.50 | Presentere menyen | |
15.55 | Setje ut brød og smør | |
16.00 | Servere forretten, amerikansk servering | To med skaldyrallergi |
16.20 | Rydde forrett, kvitvinsglas, brød og smør | |
16.30 | Skjenkje kvitvin 2 og alkoholfritt, fylle på vassmugger | |
16.40 | Servere hovudrett fisk, amerikansk servering | |
17.10 | Rydde hovudrett fisk og kvitvinsglas | |
17.15 | Tale, ca. 15 minutt | |
17.30 | Skjenkje raudvin og alkoholfritt, fylle på vassmugger | |
17.40 | Servere hovudrett kjøt, amerikansk servering | Tre godt steikte |
18.10 | Rydde hovudrett, kuvertasjett, salt og pepar, etterskjenkje vin | |
18.15 | Diverse talar, ca. 45 minutt | Kan kome uventa talar |
19.00 | Rydde raudvinsglas, skjenkje dessertvin og alkoholfritt | |
19.10 | Servere dessert, amerikansk servering | |
19.30 | Takk-for-maten-tale | |
19.35 | Kaffi og avec i salongen, rydde dessert når gjestane har reist seg for å drikke kaffi |