Samandrag – mikroorganismar

Mikroorganismar, eller mikrobar, er organismar som er så små at vi ikkje kan sjå dei utan mikroskop. Det finst veldig mange ulike typar mikroorganismar. Nokre av dei kan gjere oss sjuke, men mange er også nyttige og heilt nødvendige.

Til gruppa mikroorganismar reknar vi

• bakteriar
• virus
• sopp

• algar

• andre små eukaryotar

Bakteriar er prokaryote organismar og består av berre éi prokaryot celle. Prokaryote celler er svært enkle samanlikna med eukaryote celler. Dei har få indre strukturar og organellar og er utan cellekjerne.

Virus er ikkje celler, men partiklar som består av arvestoff pakka inn i ei proteinkappe. Så lenge eit virus er utanfor ei levande celle, har det ingen av funksjonane som kjenneteiknar ein levande organisme. Men situasjonen er ein heilt annan når viruset har kapra ei celle.

Eukaryote mikroorganismar er ei svært mangfaldig gruppe. Ho omfattar mellom anna algar, sopp og andre organismar som det er vanskeleg å putte inn i ein kategori. Det dei har til felles, er at dei er bygde opp av berre éi eller nokre få eukaryote celler. Det vil seie celler som har ein avgrensa cellekjerne.

For eincella organismar er celledeling den einaste måten dei kan formeire seg og produsere nye avkom på. Prokaryote organismar formeirar seg ved ein spesiell type celledeling: binær fisjon. Når organismen får ein viss storleik, deler han seg på midten og blir til to skilde organismar.