Det blir fleire pensjonistar i landet vårt, og mange av dei liker eit lengre opphald i varmare strøk om vinteren. Korleis kan vi leggje til rette for flotte reiseopplevingar for pensjonistar i Noreg om vinteren, som eit alternativ til ein sydentur?
Oppgåve 1: rollespel
- Jobb i grupper på tre.
- De skal lage eit rollespel der de representerer høvesvis pensjonistane, ein norsk turoperatør og eit destinasjonsselskap.
- Rollespelet skal vere eit møte mellom dei tre partane der de diskuterer nye reisetilbod i Noreg for pensjonistar. Innleiingsvis skal de diskutere kva som er bra og mindre bra med dagens tilbod.
Forarbeid
- Lag eit intervju for å innhente litt bakgrunnsinformasjon. Formuler spørsmål om reiseønske og behov ved ein noregsferie.
- Gjennomfør intervjuet med nokre pensjonistar de kjenner.
- Undersøk på nettet kva reisetilbod som finst for pensjonistar i Noreg.
- Kva tilbod finst i form av pakketurar?
- Kva aktivitetstilbod finst?
- Korleis blir det lagt til rette for turar for pensjonistar?
- Er det mange eller få tilbod?
- Kva tenkjer de er viktige faktorar å leggje vekt på når de skal lage pakketurar i Noreg for pensjonistar?
- Korleis blir reisetilboda marknadsførte for pensjonistar?
- Kva behov og ønske har pensjonistane? Og kva skal til for at dei vil byte ut ein tur til Spania med ei noregsreise?
- Lag rollespelet.
- Framfør rollespelet for klassa.
Oppgåve 2: presentasjon
- Med utgangspunkt i rollespelet skal de lage eit forslag til ei vekes noregsreise for pensjonistar. Forslaget skal innehalde
- transport
- overnatting
- servering
- aktivitetar og opplevingar
- Lag ein presentasjon av forslaget og framfør han for klassa. La klassa kome med forslag som kan gjere noregsreisa endå betre.
Lykke til!
CC BY-SASkrive av Cathrine Meyer Johansen.
Sist fagleg oppdatert 04.12.2020