Med den sterke internasjonale merksemda rundt miljø og klima har store delar av reiselivsnæringa hatt utfordringar med å forsvare bidraga sine til utslepp, forureining og negativ påverknad på lokal kulturarv.
Miljøutfordringar
Stadig fleire reiselivsaktørar legg berekraft og miljømedvit til grunn ved produktutvikling. Dei er òg meir medvitne på å marknadsføre det dei gjer for å minske miljøavtrykket frå gjestane.
Flyselskap og turoperatørar jobbar hardt for å bli meir miljøvenlege. Kostnadene med miljøsatsinga er det ofte turistane som må betale, gjennom auka avgifter og frivillige donasjonar.
TUI sitt arbeid for ei meir berekraftig verd
For å redusere utslepp og bli meir attraktive og miljøvenlege innfører fleire cruise- og ferjeselskap elektriske løysingar eller hybrid-løysingar på skipa. Det blir òg lagt om til mindre bruk av plastprodukt i heile reiselivsnæringa.
Klimautfordringar
Klimaendringar er ei anna stor utfordring for reiselivet. Til dømes vil varmare og meir ustabile vintrar kunne føre til mindre etterspurnad frå skiturister og brevandrarar.
Skianlegga kan kompensere med meir produksjon av kunstsnø. Til dømes opna verdas største innandørs skianlegg Snø utanfor Oslo i 2019. Dei omtaler seg sjølv som "verdens råeste helårsarena for snøopplevelser".
Hetebølgjer, særleg i Sør-Europa, finst stadig oftare. Dette kan føre til ein svikt i etterspurnaden etter Syden-turar om sommaren.