Nasjonal organisering av reiselivet

Opne bilete i eit nytt vindauge

CC BY-NC

Bilete: Lars Erik Skrefsrud

Reiselivsnæringa består av små og store bedrifter som sel produkt til turistar og reisande. Det jobbar rundt 170 000 menneske i reiselivsnæringa i Noreg.

Reiselivsnæringa er blant dei største norske eksportnæringane. Utanlandske turistar brukte i 2018 10,2 milliardar kroner i Noreg.^[1] Reiselivet stod same året for ei samla verdiskaping i Noreg på heile 85 milliardar kroner.

Transport og servering er dei to største reiselivsbransjane. Veksten er likevel høgast i opplevingsbransjen, som har mangedobla verdiskapinga si det siste tiåret.

Offentlege aktørar er avgjerande for god organisering og utvikling av reiselivsnæringa, og kan delast i tre:

• staten
• fylka/regionane
• kommunane

I tillegg er det nokre halvoffentlege aktørar som er viktige:

• forskings- og utviklingsmiljøa
• landsdels- og destinasjonsselskapa

Den forventa velstandsauken, befolkningsveksten og teknologiutviklinga gjer at vi forventar framleis vekst i reiselivsnæringa òg. Men veksten kan føre med seg utfordringar med tanke på ønsket om eit berekraftig reiseliv.

Nærings- og fiskeridepartementet skriv i artikkelen Reiselivsnæringen i Norge (2019):

Samtidig kan økningen i antall reisende gi økt belastning på naturressurser, kulturminner og lokalsamfunn. Utfordringer knyttet til sosial og miljømessig bærekraft må håndteres på en god måte, for å bevare et reisemåls attraksjonsverdi og den lokale oppslutningen om reiseliv som næring.

For å sikre eit berekraftig reiseliv har regjeringa som mål å betre koordineringa av den offentlege innsatsen for reiselivet. Dei ønsker å styrke samarbeidet med reiselivsnæringa, også internt.

Det er mange statlege aktørar som er involverte i reiselivsnæringa.

Nærings- og fiskeridepartementet

Nærings- og fiskeridepartementet har det overordna ansvaret for reiselivsnæringa i Noreg. Departementet har ansvaret både for utforminga av politikken og for tiltak retta mot reiselivsnæringa.

Regjeringa ønsker ein strategi som sikrar at norsk reiseliv utviklar seg i ei meir berekraftig retning. I 2020 gav departementet derfor Innovasjon Noreg i oppdrag å utarbeide ein ny reiselivsstrategi. Strategien har fått namnet Nasjonal reiselivsstrategi 2030 – "Sterke inntrykk med små avtrykk".

Andre involverte departement

Også andre departement har oppgåver knytte til reiselivet i Noreg. Blant desse finn vi

Landbruks- og matdepartementet

løyver midlar til profilering av Noreg som reisemål og satsinga på Noreg som mat- og reiselivsdestinasjon

Kommunal- og moderniseringsdepartementet

støttar reiselivet gjennom løyvingar til kommunar, fylkeskommunar og Innovasjon Noreg

Samferdselsdepartementet

legg til rette infrastruktur, til dømes Nasjonale turistvegar

Klima- og miljøverndepartementet

forvaltar natur, kulturminne og kulturmiljø, landskap, arealplanlegging og friluftsliv

Kunnskapsdepartementet

er ansvarleg for opplæring og kunnskapsutvikling innanfor reiselivet

Kulturdepartementet

har nemnt opp eit eige samarbeidsråd for kultur og reiseliv som skal foreslå tiltak som kan bidra til at vi får fleire kulturbaserte reiselivsprodukt som er av betre kvalitet og meir tilgjengelege

Utanriksdepartementet

gir reiseråd og reisetips for utanlandsreiser

Opne bilete i eit nytt vindauge

CC BY-NC-SA

Bilete: Bård Løken

Innovasjon Norge

Innovasjon Norge er eit statleg selskap som har i oppgåve å bidra til nyskaping i næringslivet, utvikling i distrikta og utvikling av konkurransedyktige norske bedrifter. Innovasjon Norge profilerer norsk næringsliv og Noreg som reisemål.

Dei statlege midlane til reiselivsformål er i all hovudsak samla i Innovasjon Norge. Hittil har rundt halvparten av midlane gått til marknadsføring av Noreg eller norske regionar som reisemål.

Innovasjon Norge sitt arbeid med reiseliv skal i framtida bidra til auka lønsemd, mellom anna gjennom satsing på

• forbrukarmarknadsføring, med kampanjar retta mot prioriterte marknader
• marknadsføring på nettet, via Noregs offisielle reiselivsportal, visitnorway.com
• marknadsanalyse og statistikk, det vil seie innhenting, behandling og publisering av data som verkar inn på reiselivsnæringa

• utvikling av reisemål, det vil seie rådgiving og støtte i samband med nettverksbygging, kompetanseheving og finansiering

  
  

visitnorway.no

Den viktigaste nasjonale formidlingskanalen til Innovasjon Norge i marknadsføringa av Noreg som ferieland er visitnorway.no. Portalen skal bidra til å skape reiselyst og inspirere nordmenn til å reise i Noreg. I tillegg skal visitnorway.no gjere det enklare for nordmenn å planlegge og førebu ferien.

Opne bilete i eit nytt vindauge

CC BY-NC

Bilete: Tore Wuttudal, Samfoto

NHO Reiseliv er knytt til Næringslivets Hovedorganisasjon (NHO), som er den største interesseorganisasjonen for bedrifter i Noreg. NHO Reiseliv jobbar for å fremme interessene til norsk reiseliv og er den største arbeidsgivar- og næringsorganisasjonen for reiselivet i Noreg. Dei har over 3 400 medlemsbedrifter og seks regionskontor fordelte over heile landet. NHO Reiseliv jobbar òg for å gi medlemsbedriftene gode arbeidsvilkår.