NCS fargekodar

Begrensa bruk

Bilete: NCS®©/Norwegian Colour Senter AS

NCS er eit kommunikasjonssystem for fargar som byggjer på korleis vi menneske ser fargar. Systemet blir brukt i fargehandelen. Fargekodar gjer at vi kan snakke om same farge utan misforståingar.

Begrensa bruk

Bilete: Norwegian Colour Senter. Ncscolour.no

Kodane byggjer på elementærfargane sine forhold til kvarandre, og tala står alltid i %.

Kodane fortel oss kvar fargen ligg på kulørtonekretsen (fargesirkelen til NCS) og i nyansetrekanten.

Begrensa bruk

Bilete: Norwegian Colour Senter. Ncscolour.no

Y90R viser at kulørtonen inneheld gulheit (Y) og raudheit (R). Talet viser kor mange prosent det er av den siste fargen. Her blir det 90 % raudheit (R). Summen i % skal alltid vere 100. Då kan vi rekne oss fram til at det må vere 100 % - 90 % = 10 % gulheit (Y).

Begrensa bruk

Bilete: Norwegian Colour Senter. Ncscolour.no

Tala 1050 beskriv nyansen. Dei to første tala fortel kor mykje svartheit det er. Mens dei to siste tala beskriv kulørtheit (fargestyrke). Nyansen i dømet har 10 % svartheit og 50 % kulørtheit (fargestyrke). Summen skal alltid vere 100 %. Vi kan derfor rekne oss fram til kvitheita:
100 % - 10 % - 50 % = 40 % kvitheit.

I modellen av nyansetrekanten står S for kor mykje svartheit det er i fargen, og C fortel kor mykje kulør (farge) det er. W står for kvitheit.

Nøytrale fargar

Begrensa bruk

Bilete: NCS®©/Norwegian Colour Senter AS

Gråtonane mellom kvit og svart er nøytrale. Dei inneheld ikkje kulør. I staden for ein kulørtone får dei bokstaven N i koden.

Gråtonen har 45 % svartheit og ingen kulørtheit.
100 % - 45 % = 55 % kvitheit
Fargen er altså ein rein grå, utan kulør.

S framom koden betyr at koden er standardisert. Det vil seie at den er ein av dei 1950 NCS-kodane som er norsk og internasjonal standard.

S framom koden betyr også Second Edition, andre utgåve. Det vil seie at koden er gjeldande standard frå 1995. Kodar utan bokstaven S, kallar vi for ustandardiserte NCS-kodar. Det er viktig å merke seg at det kan vere nyanseforskjel på ein NCS-kode med og utan S.

Fargehandlarar har ofte ein NCS-skannar som kan analysere ulike overflater og finne den nærmaste NCS-fargekoden. Slik kan du få hjelp til å identifisere ein farge, uavhengig av materiale.