Det er sjølvsagt ikkje lett å vite i november når våren kjem året etter, men vanlegvis går det ganske bra å treffe tidspunkta for paring, fødsel og beiteslepp. Avlsarbeidet med sau er ofte organisert i såkalla vêrringar, der fleire sauehaldarar nyttar dei beste vêrane systematisk.
Inseminering
For å førebyggje spreiing av sjukdom hos sau er det dei seinare åra innført restriksjonar på transport av avlsdyr. Dette har gjort at kunstig inseminering har vorte meir utbreidde, sjølv om det ikkje er like lett å få kunstig inseminering til å fungere hos sau som det er hos storfe.
Fôring når søyene er drektige
Mot slutten av drektigheitstida er det tilrådd å gruppere søyene etter alder og talet på foster. Då kan vi i best mogleg grad tilpasse fôringa til næringsbehovet. Særleg er drektige åringar krevjande, sidan dei både skal ha næring til foster og nye lam og har behov for næring til eigen tilvekst. Det kan diskuterast om lamma bør bli bedekte i det første leveåret sitt, men av omsyn til lønsemd og produktivitet blir dette vanlegvis tilrådd.
Lamming
I lammingsperioden er det naudsynt med hyppige tilsyn i sauefjøset. Ofte er det behov for hjelp under fødselen, eller dei nyfødde lamma kan trenge ekstra oppfølging. I filmen under er det døme på korleis det er laga fødebingar til sauane.
Gardsbesøk
I filmen om lamming på Landet gård på YouTube kan du sjå noko av arbeidet som skjer på ein gard med sau om våren, og bonden fortel om korleis det er å jobbe med sau.
Diskuter
Nemn viktige argument for og imot å bedekkje lam den første hausten dei lever.
Hugselappen
Det finst fleire opphavlege sauerasar.
Norsk kvit sau er ein rase som er avla fram ut frå ulike avlsmål.
Vêrringar samarbeider om gode avlsdyr. For å unngå smitte av sjukdom har inseminering vorte meir vanleg på sau.
Sauane blir para om hausten, og lamminga går føre seg nokre veker før beiteslepp.