Fagstoff

Risikomoment: måling som inneheld tungmetall

Nokre målingstypar er tilsette tungmetall for å få spesielle eigenskapar. Tungmetall kan vere kreftframkallande og forårsake nyreskade. Derfor er det viktig at du tek forholdsreglar og bruker verneutstyr i samsvar med sikkerheitsdatabladet frå målingsprodusenten.

Grunnstoffet krom. Krystallar og kube. Foto. — Grunnstoffet krom er eit tungmetall som kan vere helseskadeleg, spesielt om du pustar inn støv eller damp ved oppvarming. Kva kan du gjere for å redusere helserisikoen?

Helsefare: måling som inneheld tungmetall

Av og til blir tungmetall brukt i pigment, tilsetjingsstoff og målingstørkarar. Tungmetall er stoff som sink, kopar, bly, krom, nikkel og kobolt. Dei kan skade luftvegar, lunger og kroppen generelt når du pustar inn støv og damp.

Sink kan forårsake sinkfeber (metallfeber). Metallfeber er ein influensaliknande sjukdom. Han gir symptom som hoste, frysningar, feber, uvelheit og muskelsmerter.
Kopar kan òg forårsake metallfeber.
Bly kan skade blodcellene og føre til anemi, skjelettskadar, redusert fruktbarheit og skade på sentralnervesystemet.
Krom kan gi allergisk reaksjon, og det kan vere kreftframkallande.
Nikkel og kobolt kan òg gi allergisk reaksjon (sensibilisering).

Beskyttande tiltak

Den største risikoen for å bli utsett for tungmetall er ved innanding, altså når du pustar inn støv eller damp i lufta.

For å redusere faren for det kan du bruke personleg verneutstyr som dekker heile kroppen:

vernemaske
verneklede som dekker heile kroppen
støvlar og hanskar