Fagstoff

Risikomoment: epoksy

Epoksy er eit mykje brukt materiale i måling. Det er viktig å vite kva risikomoment som er knytte til bruken av epoksybaserte produkt.

Lakk og tilsetjingsstoff som tynnarar og herdarar, og eit blandebeger med rørepinne inne i eit kabinett. Foto. — Blanding av måling og lakk bør føregå i eit godt ventilert mikserom. Her ser vi lakk og tilsetjingsstoff som tynnarar og herdarar, og eit blandebeger med rørepinne.

Farar

Skal du jobbe med epoksybaserte produkt, må du kjenne til følgande risikomoment:

Du kan få eksem og allergiske reaksjonar på huda.
Flytande epoksyar med låg molekylvekt (under 700) har størst sannsyn for å gi ein allergisk reaksjon.
Ein allergisk reaksjon på epoksy er irreversibel.

Dei som er hypersensitive, må halde seg unna epoksy.

Beskyttande tiltak

Skal du jobbe med epoksybaserte produkt, kan du beskytte deg med desse tiltaka:

Bruk verneklede som dekker heile kroppen, og bruk hanskar.
Reingjer korrekt med vatn, såpe og reingjeringskrem.
Bruk eingongskjeledress.

Helsefare med epoksyharpiksar

Molekylvekta til dei spesielle harpiksane avgjer graden av toksisitet i epoksyharpiksar. Epoksyharpiksar med låg molekylvekt har generelt låg viskositet og er svært flyktige.

Sambindingar med lågare viskositet blir tekne lett opp i kroppen gjennom huda eller i innhaldet i mage-tarmkanalen. Det kan auke absorpsjonen.

På den andre sida er sambindingar med høgare viskositet vanskelege å fjerne frå klede og hud. Restar kan derfor sitje igjen utan at vi ser det. Fullstendig fjerning kan krevje organiske løysemiddel. Det kan auke risikoen for løysemiddelskadar.

Høg flyktigheit kan føre til respiratorisk inhalering og hudeksponering ved damp.