Følg ein debatt

Opne bilete i eit nytt vindauge

CC BY-NC-SA

Bilete: Gorm Kallestad

Finn fram til eit tema som blir diskutert i kommunen din akkurat no, ei aktuell sak som mange har meiningar om. Følg denne saka og vis kor og korleis ho blir debattert. Lag ein presentasjon der du viser følgjande:

• Litt om saka og bakgrunnen.
• Utviklinga i saka: Kor ho blir diskutert og kva som kjem ut av diskusjonane.
• Di vurdering av denne prosessen.

PS. Dersom du ikkje har høve til å bruke tid til å følgje ein slik prosess i nåtid, kan du ta for deg ei sak som er ferdig debattert og avgjort, der du nøstar tilbake i prosessen. Dette kan du gjere ved å bla i aviser (papiraviser og nettaviser) og snakke med folk som var involverte i saka.

Finn fire saker i to ulike nettaviser, der mange har kome med innlegg i kommentarfeltet. Studer kommentarane og gje ei vurdering av dei. Du kan mellom anna finne ut om dette:

• Kven er deltakarane i kvar av diskusjonane? (Kjønn, alder, politisk eller anna gruppetilknyting.)
• Kva kjenneteiknar kvar av diskusjonane? (Er innlegga saklege? Er det lange, forklarande innlegg eller korte setningar? Held ein seg til saka? osb.)
• Korleis utviklar diskusjonane seg? (Sklir dei eventuelt ut på nokon måte? Korleis?)
• Er det skilnader mellom innlegg frå anonyme og frå namngjevne personar? Kva går skilnadene eventuelt ut på?
• Er det skilnader mellom ulike nettaviser på korleis debattane går føre seg?
• Følgjer deltakarane dei reglane som er sett for debattane?
• Har debattane moderatorar ?
• Tykkjer du debattar i nettavisene bør ha moderatorar? (Grunngi svaret ditt.)