Klima og solidaritet

Vi som lever i vestlege og godt utvikla land, har størst klimagassutslepp og størst økologisk fotavtrykk. Samtidig er det slik at vi i mange tilfelle òg er dei som slepp billigast unna konsekvensane av klimaendringane og har størst evne til å omstille oss. Dette heng saman med at den sosiale sårbarheten er lågast i godt utvikla vestlege land. Vi har med andre ord gode mogelegheiter for å tilpasse oss klimaendringane og takle dei konsekvensane som eventuelt rammar oss.

Set dykk i grupper med 3–6 elevar i kvar gruppe. Sjå på figuren under og svar på oppgåvene.

Figuren viser utviklinga av fordelinga av verdas totale CO₂-utslepp sidan 1750. India har til dømes ganske store årlege utslepp i dag, men hadde i 2021 berre sloppe ut 3,37 % av det totale utsleppet i verda sidan 1750.

1. Diskuter figuren og sørg for at alle på gruppa forstår kva figuren viser, og kva det vil seie at figuren viser kumulative utslepp.

2. Figuren tek ikkje omsyn til talet på innbyggarar. Diskuter om det kan vere problematisk. Kva er fordelar og ulemper med å fordele på talet på innbyggarar?

3. I figuren over inngår Noregs del av utsleppet i "Europa utanfor EU". Korleis trur du Noregs del hadde sett ut viss han hadde blitt vist for seg sjølv? Kva om figuren hadde vist utslepp i forhold til talet på innbyggarar?

4. Land som India og Brasil har ganske store utslepp i dag. Dei har likevel ganske små utslepp totalt i historia. Burde land som India og Brasil få ha større utslepp framover for å utvikle økonomien sin? Og burde vestlege land, som har store utslepp historisk sett, kutte raskare enn andre land?