Mjølkefeber

Mjølkefeber kjem av mangel på kalsium, og det er ein dødeleg sjukdom viss han ikkje blir behandla. Sjukdommen oppstår i samband med fødsel hos kyr fordi mjølkeproduksjonen bruker av kalsiumlagera til kroppen.

Andre namn på sjukdommen er kalvingslamming og hypokalsemi (hypo = "for lite", kalsemi = "kalsium").

Symptom

Sjuke dyr vil ikkje klare å ete, og dei blir ofte liggande utan å kunne reise seg.

Mjølkefeber oppstår når kroppen bruker for mykje kalsium i forhold til det han har kapasitet til. Stress og andre negative miljøfaktorar kan gjere dyra meir utsette.

Hos kyr oppstår sjukdommen i samband med fødsel. Mjølkeproduksjonen krev mykje næring, og når juret lagar mjølka, blir kalsium trekt ut av reservane til kroppen for å inngå i mjølka.

Hos søyer oppstår mjølkefeber like gjerne før fødselen, fordi kroppen bruker så mykje kalsium til fosterveksten.

Tiltak som kan vere med på å førebygge at dyra blir sjuke:

• Riktig fôring i drektigheitstida. Pass på at kyr og kviger ikkje blir for feite.

• Ikkje flytt eller stress dyra i tida før fødselen.

• Mjølk ut berre den mengda kalven treng dei første dagane. Det blir produsert mindre mjølk i juret når du ikkje tømmer det, og kua beheld meir av kalsiumet i kroppen.

Viss dyret ikkje et, ikkje klarer å reise seg og i tillegg har nedsett kroppstemperatur, er det viktig med dyrlegebehandling så raskt som mogleg! Det er stor sjanse for at dyret døyr utan behandling.

Dyrlegen gir kalsium direkte i blodet, og så er det viktig å få dyret opp på beina igjen. Nokre gonger må behandlinga blir gjenteken fleire gonger.

Sørg òg for at dyret får

• lunka vatn å drikke frå bøtte, fleire gonger!

• mjukt underlag for å hindre liggesår.

Viss dyret ligg, må du sørge for å snu det frå den eine til den andre sida for å unngå skadar i musklane. Dette er spesielt viktig for store og tunge kyr!

Vel rett svar på spørsmåla. Klikk på pilen for å gå vidare til neste spørsmål.