Kullutjamning eller deling av kull?

Kullutjamning er å flytte grisungar frå ei purke som har for mange ungar i forhold til talet på spenar, over til ei som har færre grisungar. Purkane bør ha fødd omtrent samtidig, sånn at det ikkje blir for stor aldersforskjell på grisungane. Kullutjamninga bør skje i løpet av dei første 2–3 døgna etter fødselen.

Råmjølk frå mor!

Før du flytter ein grisunge over til ei anna purke, skal han drikke det første målet med råmjølk hos mora. Råmjølka skal sikre at grisungane får med seg dei viktige immunstoffa. Ho er òg veldig energirik og gir grisungen litt å gå på når han skal over til fostermora og finne plassen sin i den nye søskenflokken.

Kva grisungar bør du flytte?

Ved kullutjamning skal du alltid flytte dei største og mest aktive grisungane i kullet. Desse har gode føresetnader for å hevde seg i det nye kullet. Samtidig gir du dei svakaste grisungane større sjanse til å hevde sin rett utan å måtte forhalde seg til eit heilt nytt miljø i tillegg.

Puljedrift

Puljedrift betyr at du har gruppert purkene dine i puljar som er på same stadium i livssyklusen. Då har du fleire purker som skal grise omtrent samtidig, og du kan ofte lykkast med å finne ei fostermor viss nokre av purkene får altfor mange grisungar.

Viss du ikkje har høve til å setje grisungar over til ei av dei andre purkene, kan du dele kullet sånn at grisungane får vere saman med mora på skift. På den måten sikrar du at alle grisungane får tilgang til ein spene, og at dei får i seg den viktige næringa frå purkemjølka. For å lykkast med dette bør du dele kullet sånn at det er mest mogleg jamn storleik på grisungane som skal drikke samtidig. Bruk ein merkestift for å skilje mellom gruppene.

Video som viser framgangsmåte ved deling av kull (0:52)