Jerntilskot

Jernmangel fører til anemi. Viss smågrisane ikkje får nok jern, blir dei bleike og slappe. Det skjer fordi dei raude blodlekamane treng jern for å kunne frakte oksygen rundt i kroppen.

Du kan sørge for at grisungane får i seg jern på ulike måtar. Det viktigaste er at du har litt oversikt, så du veit at alle får i seg nok jern.

Jernpasta

Når du skal gi jernpasta, bruker du ei doseringssprøyte og gir kvar grisunge ein dose i munnen. Det er viktig at grisungane får i seg råmjølk før du gir dei jern. Pastaen må leggast langt bak på tunga, elles kan dei spytte han ut. Det beste er å stenge dei inne i smågrishjørnet ei stund før tildeling og så legge dei rett til juret etterpå. Då vil dei svoltne smågrisane svelge så mykje som mogleg.

Injeksjon

Ved å gi jern med ei sprøyte under huda sikrar du at alle smågrisane får same dose med jerntilskot. Viss du bruker denne metoden, bør dei få den første injeksjonen tidlegast på dag to eller helst dag tre eller fire, og så ein ny dose når dei er to–tre veker gamle. Viss grisungane er for små, kan dei bli forgifta av den første dosen, så du bør halvere dosen til dei minste i kullet.

Film som viser korleis du kan gi jern som injeksjon

Smågristorv

Dette er torv tilsett jern som du kan legge på golvet i smågrishjørnet, gjerne blanda med litt kraftfôr. Då vil grisane rote rundt i torva og utøve litt av den naturlege åtferda si samtidig som dei får i seg jern.

Flytande jern

Tilskot i flytande form kan du gi rett i munnen som første dose, etter at grisungane har fått råmjølk. Seinare drikk dei tilskotet frå ein drikkeautomat eller ei drikkeskål. Flytande jerntilskot skal som regel bli blanda med vatn til rett konsentrasjon. Derfor er det viktig at du har vatn av god kvalitet i fjøset når du skal bruke flytande jern.

Viss du er usikker på kva metode som passar best i fjøset ditt, kan det vere lurt å diskutere med dyrlegen før du bestemmer deg.