Hopp til innhald
Arbeidsoppdrag

Skap ein karakter ved hjelp av sminke, hår og spesialeffektar

Korleis kan du endre utsjånaden til ein person ved hjelp av sminke, hår og spesialeffektar? Finn ein karakter som fascinerer deg. Test ut korleis du kan skape ulike uttrykk og få fram den personlegdommen du ønskjer.
Få eit innblikk i maskør- og parykkmakarfaget, og la deg inspirere av korleis Therese Roald gir NDLAs utsending ein ny utsjånad. Video: Jarle Sten Olsen / CC BY-ND 4.0

Innleving i karakterar

Vi identifiserer oss gjerne med personar vi blir kjende med gjennom film, litteratur og teater. Sjølv om dei lever andre liv, kan vi ofte kjenne oss igjen i sorger, gleder og utfordringar dei møter.

Korleis kan du som maskør skape ein truverdig karakter? Det første du må gjere, er å setje deg inn i kven personen er, og korleis hen ser ut.

Del 1: Utforsk og studer ein karakter eller skap din eigen

Du kan velje om du vil beskrive ein kjend karakter, eller om du vil dikte opp ein eigen person.

A) Lag ei personskildring av ein kjend karakter

  1. Vel ein karakter som fascinerer deg, frå ei valfri bok, ein serie eller ein film. Om du vil, kan du velje ein av dei fem karakterane i filmklippa under.

  2. Bruk fleire kjelder og finn ut korleis personen ser ut, og kva karaktertrekk hen har.

  3. Dersom du vel ein karakter frå ein historisk periode, bør du òg undersøkje korleis moten var på denne tida.

B) Lag ei personskildring av ein karakter du sjølv diktar opp

Beskriv korleis personen ser ut, kva eigenskapar hen har, og kva slags tid og miljø karakteren høyrer heime i.

Fotomontasje av seks dokkehovud med parykkar og tilbehøyr.
Parykkar og tilbehøyr, laga ved den Norske Opera & Ballett, som speglar ulike tidsperiodar. Bilete: Tom Knudsen / CC BY-SA 4.0

Del 2: Idéutvikling

Lag skisser for korleis du kan bruke hår og sminke til å få fram det uttrykket du ønskjer.

Vurder om du skal bruke spesialeffektar. Lag i så fall skisser til korleis du kan løyse dette.

Fotografi av kvit og blå hovudmaske med piggar av lateks.
Maske laga i lateks ved den Norske Opera & Ballett. Bilete: Tom Knudsen / CC BY-SA 4.0

Del 3: Eksperimentering og førebuingar

  1. Prøv ut ulike løysingar, og finn ut kva teknikkar og materiale du vil bruke.

  2. Lag eventuelle lause delar du vil bruke som spesialeffektar.

Fotomontasje som viser forma til avstøyping av eit øyre, og det ferdige øyret.
Maskør- og parykkmakaravdelinga ved Den Norske Opera & Ballett bruker gipsformer til å støype lausøyrer. Bilete: Tom Knudsen / CC BY-SA 4.0

Del 4: Gjennomføring

Fotografi av skodespelar Charlotte Frogner, sminka som gamal kvinne.
Korleis kan du få ein person til å verke eldre enn ho er? Bilete: Lise Åserud / CC BY-NC-SA 4.0

Samarbeid med ein medelev, og byt på å vere modell for kvarandre.

  • Ta bilete av personen som skal sminkast, før de byrjar. Fotografar undervegs i arbeidsprosessen og når karakteren er ferdig.

  • Bruk, sminke, hår og eventuelle spesialeffektar til å skape karakteren du valde i del 1.

  • Ha god dialog med modellen din. Forklar kva teknikkar du bruker, og kva slags verknad du ønskjer å oppnå med dette.

Fotomontasje av kvinne med og utan sminke.
Her har maskøren skapt ein ny karakter med 1920-talsstil ved hjelp av hår, sminke og hårpynt. Bilete: Tom Knudsen / CC BY-SA 4.0

Del 5: Dokumentasjon og eigenvurdering

  1. Ta utgangspunkt i personskildringa i del 1 og vurder korleis du har klart å attskape denne karakteren.

  2. Beskriv korleis du har gjort den handverksmessige delen, gjennom bilete og tekst. Kva erfarte du gjennom utprøvingane dine, og korleis påverka dette vala dine?

  3. Vurder kvaliteten i arbeidet ditt.

Fotografi av arbeidsteikning som viser korleis ein teaterkarakter skal sminkast.
Plansje frå den Norske Opera & Ballett som viser korleis ein teaterkarakter skal sminkast. Bilete: Tom Knudsen / CC BY-SA 4.0

Relatert innhald