Inne i granateplet er det ei mengd kjernar som er omslutta av raudt, saftig fruktkjøt med konsistens nærmast som gelé. Kjernane ligg samanpressa fordelte på seks rom, slik at dei kan sjå ut som små drueklasar. Det er desse raude kjernane vi et. Smaken er søt og syrleg.
Granateple vart dyrka allereie i forhistorisk tid og vart rekna av både jødar og egyptarar for å vere ei heilag frukt. Dette er fordi soga seier at frukta inneheld 613 frø, som er like mange som det er bod i Moselova. Ofte symboliserte ho fruktbarheit.
Bruksområde
Granateple kan delast i to eller i båtar med ein skarp kniv og så etast naturell med skei eller gaffel. Granateple kan også nyttast i alle slags fruktsalatar og blir ofte servert saman med is. Granateple kan med fordel pressast til ei frisk saft. Av safta lagar ein grenadin, som er ein sterkt raud ekstrakt som blir nytta til å setje farge på drinkar og fruktsalatar.
Næringsinnhald
Granateplet har god haldbarheit og vart i gamle dagar nytta som proviant på lange reiser. Det er leskande med frisk smak. Granateple inneheld mykje antioksidantar – så mykje som 11,33 millimol per 100 g vare. Det er berre nyper (39,46 millimol) og valnøtter (20,97 millimol) som inneheld meir.
Sjå Matvaretabellen frå Mattilsynet for nærare opplysningar om næringsinnhaldet.
Kvalitetskrav
Granateple blir hausta umogne. Dei er mogne når skalet har vorte raudbrunt. Det er vanleg at skalet har ein del flekker, og at små brune prikkar er synlege når granateplet er moge. Mogen frukt gir også etter for lett trykk. Eit granateple som kjennest tungt i høve til storleiken, inneheld mykje fruktsaft.
Lagring
8–10 °C. Granateple har svært god haldbarheit. Dei kan gjerne lagrast i romtemperatur nokre veker og endå lenger på kjølerom ved 8–10 °C.